Býrabaıda vıdeoǵa túsip qalǵan bir úıir qasqyr ıt bolyp shyqty

BÝRABAI. QazAqparat - Áleýmettik jelide taraǵan Býrabaı kólinde jortyp bara jatqan bir úıir qasqyr shyn máninde ıt bolyp shyqty. Bul týraly Aqmola oblysy aýmaqtyq orman sharýashylyǵy jáne janýarlar dúnıesi ınspektsııasynyń mamandary aıtty, dep habarlaıdy QazAqparat tilshisi.

«Býrabaı» MUTP dırektsııasy Býrabaı kóliniń ústimen jortyp bara jatqan qasqyrlar týraly áleýmettik jelilerde jarııalanǵan beınejazbaǵa 30 qańtarda ınspektorlar toby zertteý júrgizdi.

«Vıdeojazbada kórsetilgen kóldiń jaǵalaý aýmaǵy, sondaı-aq, irgeles orman alqaptarynda qasqyrlardyń izin anyqtaý jumysy qolǵa alyndy. Alaıda, beınejazbada jortyp bara jatqan «qasqyrlardyń» izi ymyrt kezinde tamaq izdep muzǵa shyǵatyn ıtterdiki bolyp shyqty» deıdi vedomstvodan.

Aıta keteıik, áleýmettik jelide Býrabaı kýrorty aýmaǵynda bir úıir qasqyrdyń júrgeni týraly vıdeo taraǵan bolatyn.

«Býrabaıda qasqyrlardy kórý - sırek kezdesetin jaǵdaı, sol sebepti kent turǵyndary tań qalyp otyr.

Kýágerlerdiń aıtýynsha, bir úıir qasqyr keshe túnde aıdyń sáýlesimen Býrabaıdaǵy muz qatqan kóldiń kógildir shyǵanaq tusymen jortyp ótken.

Jeli qoldanýshylarynyń pikirleri ekige bólindi: bireýler tek qasqyrlar osylaı qozǵalady dese, al ózgeleri bul qańǵybas ıtter ekenin aıtady.

Sonymen, keshe túnde Býrabaı turǵyndaryn dúrliktirgen ne?» delingen beınejazbanyń astynda.