Býrabaıda saıatshylardyń halyqaralyq týrnıri ótip jatyr

KÓKShETAÝ. QazAqparat - Aqmola oblysynyń Býrabaı kýrortynda Táýelsizdik kúnine jáne ataqty búrkitshi Másip Batyrhanovty eske alýǵa arnalǵan saıatshylardyń «Qansonar-2019» halyqaralyq týrnıri ótip jatyr, dep habarlaıdy QazAqparat tilshisi.

Týrnırge Qazaqstannyń 12 oblysynan, sondaı-aq, Vengrııa, Mońǵolııa, Qyrǵyzstan jáne Reseı elderinen qus tilin biletin, aqsúıek ónerdi janyna serik etken 45 saıatshy qatysyp, baq synaýda.

Týrnırdiń ashylý saltanatyna aımaq basshysy Ermek Marjyqpaev qatysyp, quttyqtaý sóz sóıledi.

«Qazaqstan Táýelsizdigin alǵannan beri elimizde ulttyq sport túrleri men oıyndary jandana bastady. Onyń ishinde Aqmola oblysynda ulttyq sport túrleri keńinen qanat jaıyp keledi. Jerles sport sańlaqtary túrli halyqaralyq jáne respýblıkalyq jarystarda top jaryp júr. Bul óńirde ulttyq sport túrlerine kóńil bólinip otyrǵanyn bildiredi. Búgingi saıatshylardyń «Qansonar-2019» halyqaralyq týrnıri - sonyń jarqyn kórinisi. Barshańyzdy alda kele jatqan Táýelsizdik merekesimen quttyqtaımyn, al, jarysqa qatysýshylarǵa tek jeńis tileımin», - dedi aımaq basshysy Ermek Marjyqpaev.

Týrnır baǵdarlama boıynsha «Búrkitpen ań aýlaý», «Suńqarmen ań aýlaý» jáne «Qarshyǵamen ań aýlaý» sııaqty úsh kezeńnen turady. Erteń týrnırdiń qorytyndy kezeńi ótedi.

Búrkitshiler arasyndaǵy jeńimpazdarǵa bas júldege «Nıva» avtokóligi tigilip otyr. Al, ekinshi orynǵa 500 myń teńge jáne úshinshi orynǵa 300 myń teńge qarastyrylǵan. Sonymen qatar, suńqar jáne qarshyǵa salýdan birinshi oryn alǵandar 200 myń teńgeden, ekinshi oryn alǵandar 150 myń teńge, úshinshi oryn alǵandar 100 myń teńgeden alady.