Býrabaıda rekreatsııalyq klaster qurylady
Bul týraly esep berý kezdesýinde Aqmola oblysynyń ákimi Ermek Marjyqpaev aıtty, dep habarlaıdy QazAqparat tilshisi.
«BI-Group» kompanııasymen birlesip Býrabaı kentiniń rekreatsııalyq klasteriniń: otel-spa, bıýdjettik otel, akvaparktyń jobalyq tujyrymdamasy ázirlendi. Mundaǵy ınvestıtsııanyń jalpy somasy 65 mıllıard teńgeni quraıdy, onyń 10 mıllıardtan astamy bıylǵy jylǵa qarastyrylǵan. Jobany bıyldan bastap iske asyrý josparlanǵan. Biz týrızm salasyna ınvestıtsııa tartý boıynsha jumystardy odan ári jalǵastyratyn bolamyz», – dedi Ermek Marjyqpaev.
Jalpy, oblystyń týrıstik áleýeti 500-den astam nysandy quraıdy. Karantındik shekteý sharalaryna qaramastan, ótken jyly óńirge kelgen týrıster sany shamamen 200 myń adamdy qurady. Bul respýblıka boıynsha besinshi oryn. Ótken jyly «Bıznestiń jol kartasy» baǵdarlamasy sheńberinde týrızm salasyndaǵy 10 ınvestıtsııalyq joba 391 mıllıon teńge memlekettik qoldaýǵa ıe boldy.
«Týrıstik ınfraqurylymdy damytý maqsatynda 2020 jyly 5 mıllıard teńge bólinip, ıgerildi. 6 mıllıardtan astam teńge qarjyǵa toǵyz is – sharany iske asyrý aıaqtaldy», - dep túıindedi aımaq basshysy.