Býrabaıda ótetin TMD Úkimet basshylary keńesine 7 el qatysýyn rastady

ASTANA. QazAqparat - Jeti eldiń úkimet basshylary 29 mamyr kúni Býrabaıda ótetin TMD úkimet basshylary keńesiniń otyrysyna qatysatynyn rastady. Bul týraly búgin tilshilerge Atqarýshy komıtettiń tóraǵasy - TMD atqarýshy hatshysy Sergeı Lebedev habarlady, dep habarlaıdy BELTA.

«Otyrysqa qarqyndy daıyndyq jumystary júrgizilip jatyr. Otyrysqa qatysatynyn jeti eldiń úkimet basshysy rastady», - dep aqparattandyrdy Sergeı Lebedev.

ÚBK-niń qaraýyna elderdiń birinshi kezekte ekonomıkalyq saladaǵy yntymaqtastyǵyn reglamentteıtin qujattardyń 20-dan astam jobasy shyǵarylǵan. «Birinshi másele - TMD-ǵa qatysýshy memleketterdiń qarjy-ekonomıkalyq salasyndaǵy mańyzdy máselelerdi sheshý boıynsha Birlesken is-qımyl josparyn qarastyrý bolmaq», - dedi TMD Atqarýshy komıtetiniń tóraǵasy.

ÚBK-niń kún tártibinde basqa da kóptegen máseleler bar. Osylaısha, úkimet basshylary aldaǵy on jylda orman sharýashylyǵy jáne orman ónerkásibi salasyndaǵy yntymaqtastyqtyń negizgi baǵyttaryn anyqtaıdy. TMD memleketteriniń aımaqaralyq jáne shekara mańy yntymaqtastyǵy kontseptsııasynyń 2020 jylǵa deıingi kezeńdegi jobalary men olardy iske asyrý boıynsha sharalar jospary qarastyrylmaq. Budan basqa, qaraýǵa zııatkerlik menshik salasyndaǵy kadrlardy daıarlaý, kásibı qaıta daıarlaý jáne kásibıligin arttyrý memleketaralyq júıesin qalyptastyrý jáne damytý Kontseptsııasynyń jobasy engizilip otyr.

Sondaı-aq gýmanıtarlyq sıpattaǵy qujattar blogy daıyndaldy. Atap aıtqanda, úkimet basshylary 2016-2020 jyldary mádenıet salasyndaǵy yntymaqtastyqtyń negizgi sharalarynyń jobasyn qarastyrady.

Qaýipsizdik salasynda TMD elderiniń aýmaqtarynda halyqaralyq baǵytta tasymaldaý, radıatsııalyq, hımııalyq jáne bıologııalyq jaǵdaıdy baqylaý jáne baǵalaý, Dostastyq elderiniń qarýly kúshterinde áskerı-qoldanbaly sport túrlerin damytý máseleleri talqylanady.