Býrabaıda qys boıy baptalǵan aqqý men birqazan Jaınaq kóline jiberildi

BÝRABAI. QazAqparat – «Býrabaı-Damý» mamandary jyly jaqqa usharda úıirinen qalyp qoıǵan aqqý men birqazandy tabıǵat aıasyna jiberdi, dep habarlaıdy QazAqparat baqtyń baspasóz qyzmetine silteme jasap.

Byltyr kúzde jyly jaqqa bet alǵan tobynan qalyp qoıǵan suńqyldaq aqqý men birqazandy jergilikti turǵyndar taýyp alyp, Býrabaı kentindegi zoologııalyq baqqa ákelgen bolatyn. «Býrabaı-Damýdyń» veterınarlary qustardy emdep, qys boıy baptaǵan. Mamandar alty aı qysta ál jınap, óz betinshe ómir súrýge jarap qalǵan qustardy Býrabaı aýdanyndaǵy Jaınaq kóline jiberdi.

«Suńqyldaq aqqý men birqazan – elimizdiń Qyzyl kitabyna engen qustar. Kúzde bizge ákelgen kezde veterınarııalyq tekserýden ótkizip, qabyldap aldyq. Álsirep, qatty qorqyp qalǵany bolmasa, zaqymdanǵan jeri joq eken. Alty aı ishinde zoologııalyq baqqa úırenip qalyp edi. Biraq, báribir jabaıy tabıǵat aıasynda, ózderiniń ortasynda ómir súrgeni durys», - deıdi baqtyń veterınary Ildar Faızýlın.

Jalpy, «Býrabaı» memlekettik ulttyq parkinde qustyń 197 túri bar. Onyń 14-i Qyzyl kitapqa engen.