Býrabaı qysynyń keremet kórinisteri - fotorep
Býrabaıda qys qarly, ári aıazdy keledi. Tipti, qańtar aıynyń keıbir kúnderi aýa temperatýrasy mınýs 40 gradýstan tómen túsýi múmkin. Degenmen, kýrortty óńirde aýa raıynyń qolaıly kúnderi tamasha qysqy ekskýrsııalar uıymdastyrýǵa bolady.
Máselen, «Býrabaı – Qazaqstannyń injý-marjany» dep atalatyn ekskýrsııa han asýynyń shyńy sııaqty jerlerge barýdy qamtıdy. Bul – taýlarǵa tańǵajaıyp panorama ashylatyn baqylaý alańy. Ol jerden kórinetin Jekebatyr, Býrabaı, Kókshetaý taýlarynyń kórinisi birden baýrap alatyny sózsiz.
Kókshetaý taýyndaǵy Abylaı han alańynda sizdi Úsh-qyz, Oqjetpes taýlary qarsy alady. Olardyń árqaısysy týraly qazaq halqynyń tarıhy men ózindik ereksheligin beıneleıtin tańǵajaıyp ańyzdar jınaqtalǵan. Saıahatshylar Abylaı hannyń taǵyn tamashalap, sýretke túsip, tilek tileıdi.
Kelesi núkte – Kógilir shyǵanaq. Ol Áýlıekóldiń (Býrabaı kóli) sol jaq jaǵalaýynda, Kókshetaý jáne Temirtaý silemderiniń ortasynda ornalasqan. Shyǵanaqtyń dál ortasynda – áıgili Jumbaqtas jartasy kóz tartady. Eger Býrabaıdan Abylaı han alańyna qaraı, qaıyq stansasynyń janynan júrip kele jatsańyz, ol shashy jelbiregen jas sulý qyzǵa uqsaıdy, ári qaraı baıaý júre berseńiz, ádemi qyz beınesi kári kempirge aınala beredi, al Oqjetpes shıpajaıy jaǵynan qarasańyz, Sfınkstiń beınesin kórýge bolady.
Bólektaý – Býrabaıdyń boıynda ornalasqan tabıǵı sholý alańy. 147 metr bıiktikten Kógildir shyǵanaq, Jumbaqtas jartasy men Oqjetpes taýy, Býrabaı jáne Úlken Shabaqty kólderi sııaqty, osy óńirdiń basty kórnekti oryndaryna keremet kórinister ashylady.
Imanaev aǵynynda taý sýynyń syldyr áýenin estip, taza aýa men Býrabaıdyń sózben jetkizgisiz sulýlyǵynan lázzat alýǵa bolady.
Sondaı-aq, týrıster top bolyp, bir kúndik saıahat jasaı alady. Onda Býrabaı kýrortynyń ásem oryndary, sondaı-aq, maral sharýashylyǵyna ekskýrsııa qarastyrylǵan.
Býrabaıǵa saıahat tek fızıkalyq qana emes, psıhologııalyq sharshaýdy da jeńildetýge, sonymen qatar erekshe qysqy oazıstiń keremet kórinisterin tamashalaýǵa múmkindik beredi.
«Býrabaı-Damý» JShS jyl boıyna týrıster úshin Býrabaı kýrortyndaǵy nysandarǵa qyzyqty ári tartymdy ekskýrsııa uıymdastyrady.