Býrabaıda karantın kezinde tıin men qustardyń sany artqan

BÝRABAI. QazAqparat – Býrabaı demalys ornynda karantın ýaqytynda tıin jáne qustardyń sany kóbeıgen. Bul týraly «Býrabaı» memlekettik tabıǵı ulttyq parkiniń dırektory Sergeı Bykov málim etti, dep habarlaıdy QazAqparat tilshisi.

«Bizdiń azamattardyń ekologııalyq mádenıeti ortashadan tómen. Bizge kelýshilerdiń arasynda demalystan soń qoqysty jınap, tazalap ketetinder bar, ókinishke qaraı iship-jep, sol jerge tastap ketetinder de kezdesedi. Al keı adamdar qoqysty kóliktiń terezesinen laqtyra salady. Jáne bul problema tek qana kól jaǵalaýynda ǵana emes», - deıdi S. Bykov.

Onyń aıtýynsha, sońǵy 15-20 jyl kóleminde Býrabaıda demalýshylardyń sany artqan.

«Munda demalýshylardyń sany ondaǵan, júzdegen esege deıin artty. Eger 1990 jyldary jylyna 10-20 myń demalýshy kelse, ótken aptanyń ózinde 50 myń adam demalysqa keldi. Árıne, tabıǵat keshenine degen antropogendik qysym bar, degenmen bizde jaz mezgili 2-3 aı ǵana, qalǵan ýaqytta kóktem, kúz, qystyń kúnderi tabıǵat tirilip, qaıta qalpyna keledi. Eger bizde jaz 5-6 aıǵa sozylsa, onda qorshaǵan ortanyń jaǵdaıy máz bolmas edi. Aıtar bolsaq, karantın men tótenshe jaǵdaı kezinde, ıaǵnı naýryz, sáýir, mamyr aılarynda Býrabaıda tıinder kóbeıip, qustar erkin án saldy. Antropogendik qysym jan-janýarlardyń tirshiligine keri áserin tıgizedi», - deıdi ol.

Ulttyq park basshysynyń sózine sensek, ótken jyly park aýmaǵynan 2 myń tekshe metrge jýyq qoqys shyǵarylsa, al bıyl mamyr aıynan beri ol kórsetkish 700 tekshe metrge jýyqtaǵan.