Býrabaıda qandaı nysandar salynady
Oblys ákiminiń orynbasary Vasılıı Krylovtyń aıtýynsha, aldaǵy ýaqytta úlken jáne kishi Shabaqty kóli mańaıynda taý-shańǵy keshenin salý josparlanyp otyr. Trassanyń uzyndyǵy - 2 200 metr. Sol jerde barlyq kommýnıkatsııalar salynady. Al Sarybulaq eldi mekeninde etnoaýyl ashylady. Sebebi sheteldik týrıster qazaq xalqynyń turmys saltyna qatty qyzyǵady. Býrabaıdyń ákimshilik ortalyǵy - Şýchınsk qalasynda da birqatar nysandar salynady degen jospar bar.
«Byltyr golfqa arnalǵan kásibı ortalyq ashyldy. Golf alańynyń uzyndyǵy - 6 000 metr. Bıyl mamyr aıynda respýblıkalyq shańǵy bazasy paıdalanýǵa beriledi. Ol jerde bıatlon alańy men shańǵy trassasy bolady. Sportshylardyń júrip-turýyna arnalǵan barlyq nysandar boı kóteredi. Sonyń arqasynda úlken xalyqaralyq jarystardy ótkizip, týrıstrdi kóptep tartýǵa múmkindik ashylady», - dedi V.Krylov búgin Şýchınsk-Býrabaı kýrorttyq aımaǵyn damytý máselelerine arnalǵan jıynda.
Onyń aıtýynsha, búginde Şýchınskte taǵy bir taý-shańǵy keshenin salý máselesi qaralyp jatyr. Ol jerde fýnıkýler qatynaıdy. Atalǵan joba ınvestıtsııalyq usynystardyń negizinde júzege aspaq.
«Al jergilikti bıýdjettiń esebinen qalanyń ortalyǵynda kópfýnktsıonaldy sport kesheniniń qurylysy bastalady. Biz forým-ortalyǵyn salý jumystaryna da úlken mán berip otyrmyz. Atalǵan nysan úsh segmentten turady. Ol jerde kórme kesheni, kontsert zaly men zamanaýı kongress-xol bolady. Qazirgi kezde jer ýchaskesi anyqtaldy. Endi, jobalaý jumystaryna kirisý kerek», - dep atap kórsetti ákimniń orynbasary.
Al QR Mádenıet jáne sport mınıstri Arystanbek Muxamedıulynyń sózine qaraǵanda, taǵy bir xalyqaralyq kompanııa Býrabaıda bes juldyzdy qonaq úıdi turǵyzýǵa múdeli.
«Endi, dál qazir bárin aıta almaımyn, biraq bir xalyqaralyq kompanııa Býrabaıda bes juldyzdy qonaq úıdi salatyn bolady. Ol Marriot nemese Four Seasons sııaqty úlken brendke aınalmaq. Sóıtip, kýrortta taǵy bir bes juldyzdy qonaq úıdiń qurylysy bastalady», - dedi A.Muxamedıuly jýrnalısterge bergen suxbatynda.