Býrabaıda demalyp jatqan 14 bala tamaqtan ýlandy

<p>BÝRABAI. KAZINFORM — Býrabaı aýdanyna demalýǵa kelgen 14 bala ýlaný belgilerimen aýrýhanaǵa jatqyzyldy.</p>

«Avıtsenna — Býrabaı» JShS dırektory Evgenıı Bekaevtyń málimetinshe, 22 maýsym kúni saǵat 01.00-den tańǵy 06.15-ke deıin 8-17 jas aralyǵyndaǵy 14 bala aýrýhananyń qabyldaý bólmesine júgingen.  

— Balalarǵa júrgizilgen saýalnama barysynda olardyń 20 maýsymda kelgeni jáne 22 maýsymda ketetini anyqtaldy. Sapardyń maqsaty — jeke demalys. 21 maýsym kúni tańǵy as ishkennen keıin (barlyq balalar ártúrli tamaq jegen: qýyrylǵan et pen kartop, borş, syrnık jáne t. b.) ýlaný belgileri paıda bolǵan, biraq balalar keshke qaraı ǵana medıtsınalyq kómekke júgingen. Belgili bir ýaqyt ótkennen keıin eki-úsh baladan birtindep aýrýhanaǵa túse bastady, — dep túsindirdi Evgenıı Bekaev. 

Balalarǵa dereý medıtsınalyq kómek kórsetildi.

12 balanyń asqazanyn jýyp, úsh balaǵa ınfýzııalyq terapııa jasaldy.

Búkil 14 baladan synama alyndy. Sondaı-aq, qusýǵa qarsy ınektsııa men spazmolıtık  berildi.

— Balalardyń kóbi medıtsınalyq kómek kórsetilgennen keıin birden ketse, qalǵany dárigerlerdiń baqylaýynan keıin aýrýhanadan shyqty, — dep tolyqtyrdy bas dáriger. 

Dárigerler ýlaný deregi boıynsha shuǵyl habarlamany Býrabaı aýdany boıynsha sanıtarlyq-epıdemıologııalyq baqylaý basqarmasyna joldady. 

Endigi kezekte sanıtarlyq dárigerler tekserýi kerek.

Balalar turyp jatqan qonaq úıdiń ıesi bul jerde tamaq berilmeıtinin eske saldy.