Býrabaıda daýyl turyp, sýdan eki sheteldik qutqaryldy

KÓKShETAÝ. QazAqparat –Býrabaı kólinde daýyl kóterilip, Ekaterınbýrgten kelgen ákesi men uly sýǵa batyp kete jazdady, dep habarlaıdy QazAqparat Aqmola oblysy Tótenshe jaǵdaılar departamentiniń baspasóz qyzmetine silteme jasap.

Ákesi men balasy Býrabaı kólinde SUP-taqtasynan aýdarylyp ketken. Týrısterdi jergilikti qutqarýshylar qutqaryp, jaǵaǵa jetkizdi.

Býrabaı aýdanynda kún raıy qubylmaly bolatyny jańalyq emes.

Keshe tabıǵat tosyn minezin taǵy kórsetip, kólde kenetten daýyl kóterildi. Úlken tolqyndardyń saldarynan eki adam mingen taqta aýdarylyp ketken. Eki týrıst qutqarý keýdesheleriniń arqasynda aman qaldy. Biraq joǵary tolqyndar olardyń taqtaǵa qaıta kóterilýine múmkindik bermedi. 10 jasar ulyn tolqyn alyp ketpeý úshin ákesi taqtaıdan myqtap ustap turǵan. Osy sátte kóldi kózben sholyp tekserý kezinde qutqarýshylar jaǵdaıdy baıqap, kómekke asyqqan.

«Biz qutqarylǵandardy jaǵaǵa shyǵardyq. Bala qatty qorqyp ketti, biz oǵan psıhologııalyq kómek kórsettik jáne 15 mınýttan keıin ol esin jıdy. Kómek kórsetken soń sý aıdynyn taǵy aınalyp óttik. Ómirlerine qaýip tónip tursa da, daýyl men tolqynǵa qaramastan, adamdar katamarandarmen júzýdi jalǵastyrǵan. Biz tótenshe jaǵdaılardy boldyrmaý úshin barlyq demalýshylardy jaǵaǵa qaıtardyq», – dedi Býrabaı qutqarý bólimshesiniń bas qutqarýshysy Andreı Jýkov.