Býrabaıda balalar lagerinde 11 jasar oqýshy seksýaldy zorlyq-zombylyqqa ushyrady

KÓKShETAÝ. QazAqparat - Aqmola oblysynyń Býrabaı aýdanyndaǵy balalar lagerinde 11 jasar ulǵa seksýaldyq sıpattaǵy is-áreket jasaǵan eki jasóspirimge qatysty sotqa deıingi tergeý amaldary júrgizilip jatyr, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, Býrabaı aýdanynyń polıtsııa bólimine Nur-Sultan qalasynyń turǵyny shaǵymdanǵan.

Aıtýynsha, aýdan aýmaǵyndaǵy áskerı-sport lagerlerdiń birinde 11 jasar ulyna kámelet jasyna tolmaǵan eki jasóspirim seksýaldy sıpattaǵy is-áreket jasaǵan.

«Qazirgi ýaqytta osy jaǵdaıǵa baılanysty sotqa deıingi tergeý amaldary júrgizilip jatyr. Onyń sheńberinde zańdy ókilderdiń jáne ózge de quzyretti tulǵalardyń qatysýymen kámeletke tolmaǵandardan saýalnama alyndy. Tıisti saraptamalar taǵaıyndaldy. Bul qylmystyq isti tergeý barysy erekshe baqylaýda. Ózge aqparat Qylmystyq protsessýaldyq kodekstiń 201-babyna sáıkes jarııa etýge jatpaıdy», - dedi vedomstvodan.

Aıta ketsek, zorlyq-zombylyq kórgen balanyń ata-anasy kómek surap «NeMolchı» qoryna júgingen.

Bul jaıynda quqyq qorǵaýshy Dına Smaılova áleýmettik jelidegi paraqshasynda jarııalǵan bolatyn.

Foto: quepasamedia.com