Býrabaıda almatylyq 10 jasar ul bala adasyp ketken
Vedomstvonyń málimeti boıynsha, oqys oqıǵa búgin Býrabaı kentinde boldy. Polıtseılerge belgili bolǵandaı kýrorty aımaqqa sporttyq radıo baǵdarlaý jáne radıo kópsaıystan QR Chempıonatyna qatysý úshin elimizdiń ár óńirinen balalar jınalǵan.
Jarys kezinde saǵat 15:00 shamasynda belgilengen jerge jarysqa qatysýshy Almaty qalasynan kelgen 10 jasar Abylaı kelmeı qalǵan. Ony uıymdastyrýshylar óz kúshterimen 2 saǵat boıy izdep nátıje bolmaǵandyqtan polıtsııaǵa habarlasqan.
«Dereý izdestirý jumystaryna polıtsııa kúshteri, tótenshe jaǵdaılar bólimshesi jáne «Býrabaı» MUTP qyzmetkerleri jumyldyryldy. Aýdandyq polıtsııa bóliminiń bastyǵy Erbol Júsipov ózge quqyq qorǵaý organdarynyń qyzmetkerleri men eriktilerdi jáne qoǵam ókilderin tarty», deıdi vedomstvodan.
Jalpy, izdestirý jumystaryna barlyǵy 40 polıtsııa, 30 qutqarýshy, «Býrabaı» MUTP 25 qyzmetkeri jáne 10 erikti atsalysty. Іzdeý toby barlyǵy 5 shaqyrym aýmaqty, ıaǵnı, kól jaǵasy men ormandy súzip shyqty.
«Nátıjesinde araǵa 3 saǵat salyp Abylaı jarys ótken orynnan 3 shaqyrym qashyqtyqta din aman tabyldy. Balanyń sózinshe, ormannyń ishinde adasyp ketip, keıin qaıtar joldy taba almaǵan. Qazirgi kezde adasqan bala qonaqúıge jaıǵastyryldy. Jaǵdaıy qanaǵattanarlyq», - dep tolyqtyrdy vedomstvonyń baspasóz qyzmetindegiler.