Býrabaıda aǵashtarǵa maska baılap ketkenderdi jeli qoldanýshylary synǵa aldy

KÓKShETAÝ. QazAqparat - «Býrabaı» ulttyq tabıǵı parkindegi aǵashtarǵa medıtsınalyq maska baılap ketken qazaqstandyqtardyń áreketi jeli qoldanýshylary arasynda qyzý talqylandy, dep habarlaıdy QazAqparat tilshisi.

Bul týraly Instagramdaǵy v_astane_official paraqshasynda jarııalandy. Onda jeli qoldanýshylar qazaqstandyq týrısterdiń ersi qylyǵyn qatań synǵa alyp, aıyppul salý qajettigin aıtýda.

«Maskalar polımerden jasalǵan, ydyraý kezeńi astronomııalyq.... 100 jyldan keıin de olar sol qalpynda turady. Dástúr boıynsha aǵashtar men qorshaǵan ortaǵa zııan tıgizbeý úshin taspalar maqtadan toqylǵan. Qoǵam ne bolyp barady? Mundaı nárseler úshin qatań aıyppul salý kerek!», - deıdi jeli qoldanýshy.

Bul rette, «Býrabaı» memlekettik tabıǵı ulttyq parkiniń dırektsııasy «Býrabaı» ulttyq parkiniń aýmaǵynda orman qoryna zalal keltirý faktisi boıynsha Býrabaıda reıdtik is-sharalar ótkizilgenin habarlady. Reıd barysynda aǵashtarǵa baılanǵan lentalar men maskalardy alyp tastaý boıynsha jumystar júrgizilgen.

Sonymen birge, mekeme basshylyǵy erekshe qorǵalatyn tabıǵı aýmaqtardy lastaǵan tulǵalar jazaǵa tartylatynyn eskertedi.