Býrabaıda 8-11 jeltoqsan kúnderi tuńǵysh ret «Qansonar» halyqaralyq týrnıri ótedi
«Aqmola oblysynda jyl saıyn ataqty qusbegi Másip Batyrhanulynyń qurmetine «Qansonar» saıatshylar saıysy ótkiziledi. Sonaý 30-shy jyldary Másip Batyrhanuly qus salyp, ań aýlap, aýyldastaryn ashtyqtan aman alyp qalypty. Al Uly Otan soǵysy jyldary óziniń adal kómekshisiniń kómegimen aýlanǵan ańdardyń baǵaly terilerin Reseıge ótkizip, sodan túsken qarjyny maıdanǵa qajetti oq-dári satyp alýǵa jumsaǵan eken», - dep atap ótti Aqmola oblystyq týrızm basqarmasy janyndaǵy týrıstik aqparattyq ortalyǵynyń basshysy Danııar Idııatov.
Bul jolǵy týrnırge Qazaqstan Respýblıkasy jáne Azııa elderinen búrkit, ıtelgi, qarshyǵa baptaýmen aınalysatyn myqty qusbegiler shaqyrtyldy. Týrnır talaby boıynsha ańshy qustardyń qolǵa qondyrý, shyrǵa tartý arqyly alǵyrlyqtary synalady. Aqtyq synǵa shyqqandar qoıan, túlki jáne qasqyrǵa alýǵa salynady.
«Sharanyń maqsaty Memleket basshysy Nursultan Nazarbaevtyń «Bolshaqqa baǵdar: rýhanı jańǵyrý» maqalasynda aıtylǵan halqymyzdyń salt-dástúrin jańǵyrtyp, nasıhattaýǵa baǵyttalǵan», - dedi Danııar Idııatov.
Aıta keteıik, uıymdastyrýshylar 2017 jyldyń 1 jeltoqsanyna deıin jarysqa qatysýshylardyń ótinishterin qabyldaıdy. Sharany tamashalaýǵa nıet bildirgenderdi Astana men Kókshetaý qalalarynan avtobýspen tasymaldaý da qarastyrylǵan.