Býrabaıda 4 jastaǵy bala ekinshi qabattyń terezesinen qulap ketti

<p>KÓKShETAÝ. KAZINFORM &ndash; Býrabaıda 4 jastaǵy bala ekinshi qabattyń terezesinen qulap, aýrýhanaǵa tústi.</p>

Aqmola oblysy PD baspasóz qyzmetiniń málimetinshe, keleńsiz jaǵdaı Býrabaı kentindegi demalys oryndarynyń birinde boldy. 

Anyqtalǵandaı, 4 jastaǵy bala jaldamaly úıdiń ekinshi qabatynda jalǵyz qalǵan. Zardap shekken bala túrli dene jaraqatymen aýrýhanaǵa jatqyzyldy. 

«Osy derekke baılanysty Qylmystyq kodekstiń 141-baby 1-bóligi (balalardy tárbıeleý jónindegi mindetterdi oryndamaý) boıynsha sotqa deıingi tergep-tekserý bastaldy. Sonymen birge, birqatar saraptamalar taǵaıyndaldy», - dedi vedomstvodan.

Aıta ketsek, budan buryn Aqmola oblysynda 1 jastan asqan bala terezeden qulaǵanyn jazǵan edik.