«Býrabaı» ulttyq tabıǵı parkiniń qyzmetkerleri apta ishinde shuǵyl túrde 7 orman órtin sóndirdi
«Qaıyrly tań, áriptester!
Shilińgir shildeniń mı qaınatar ystyǵynan ormandy jerlerde órt shyǵyp jatyr. 13-16 shilde aralyǵynda Býrabaıdyń ár bókterinde 7 ret ot tutanǵan. Abyroı bolǵanda, ormandy kúndiz-túni qoryp júrgen qyraǵy kóz ınspektorlar tilsiz jaýdyń dendeýine jol bermedi»,-dep jazdy telegram kanal.
Apat aıtyp kelmeıtindikten ábigerge salmaı ketpeıtini taǵy bar. Býrabaıdaǵy órt kezinde 1,7 ga aýmaqty jalyn sharpydy desek, onyń 0,5 ga orman alqaby. «Býrabaı» MUTP qaraýyndaǵy aýmaq ný ormandy ǵana emes, taýly-tasty bolyp keledi. Qalyń ot jazyq jerlerdi ǵana emes, kólik qatynaýy qıyn betkeılerge deıin qaýlaǵan. Mundaı jaǵdaıda ormanshylar men órt sóndirýshilerdiń is-áreketi eptilikti, shapshańdyqty ǵana emes, qajyrly eńbekti talap etedi. Osy turǵydan alǵanda ınspektorlardyń óz kásibine degen adaldyǵy tánti eterlik. Halqymyzdyń baǵyna buıyrǵan tabıǵat keremetin tilsiz jaýdan saqtap qalý jolynda ter tókken barlyq azamattarǵa alǵysym sheksiz!
«Oraıy kelgende aıta ketetin bir jáıt, «Smart National Park Burabay» júıesiniń apat jaǵdaıynda asa qajet dúnıe ekeni taǵy bir márte dáleldendi. «Smart National Park Burabay» - tilsiz jaýdy der kezinde anyqtaıtyn jáne aldyn alýǵa septigin tıgizetin elektrondyq júıe. Osy jobanyń arqasynda Ulttyq parktiń jedel basqarý ortalyǵyndaǵy qyzmetkerler jaǵdaıdy naqty baǵamdaı otyryp, órtti sóndirýge qosymsha kúshterdi tarta aldy.
«Býrabaı» MUTP bul tájirıbesi elimizdegi basqa da ulttyq parkterge úlgi bolýǵa jarap tur. Sebebi, bul jańa tehnologııalar ormandy alqapty kózdiń qarashyǵyndaı qorǵaýdyń ázirge birden-bir amaly bolyp otyr»,-delingen habarlamada.