«Býrabaı» ulttyq parkiniń qyzmetkerleri shashylyp jatqan qoqysqa qatysty pikir bildirdi
KÓKShETAÝ. QazAqparat – «Býrabaı» memlekettik ulttyq tabıǵı parkiniń (MUTP) qyzmetkerleri áleýmettik jelide taraǵan Şýche-Býrabaı kýrorty aýmaǵyndaǵy kólderdiń jaǵasynda shashylyp jatqan qoqys týraly aqparattarǵa qatysty pikir bildirdi, dep habarlaıdy QazAqparat tilshisi.
Vedomstvonyń málimetinshe, «Býrabaı» MUTP Aqmola oblysynyń ǵana emes, ózge kórshi oblystar men taıaý shet elderdiń turǵyndarynyń demalatyn súıikti orny. Jyl saıyn ulttyq parkke 600 myńnan astam adam keledi. Ásirese, demalys jáne mereke kúnderi kelýshilerdiń sany kúrt artady. Sol sebepti, demalyp ketken adamdar ózderinen keıin qoqystaryn qaldyryp ketetin kórinedi.
«Ulttyq parktiń aýmaǵynda sıymdylyǵy 1 tekshe metr bolatyn barlyǵy 65-ten astam qoqys konteıneri ornatylǵan. Onyń ishinde 25 qoqys konteıneri Býrabaı kóliniń jaǵasynda ár 200 metr saıyn ornatylǵan. Budan bólek, usaq qoqystardy salatyn 50 aǵash jáshik bar, onyń 30-dan astamy kól jaǵasynda. Mundaǵy metall konteınerler qatty turmystyq qaldyqtar men qoqystarǵa, al aǵash jáshikter usaq qoqystarǵa arnalǵan. Alaıda, óńir turǵyndary men qonaqtarynyń jaýapsyzdyǵy jaǵajaı aýmaǵyn antısanıtarlyq jaǵdaıǵa ákelip soqtyrýda. Ásirese, iri qoqystardan usaq qoqystar salatyn jáshik tez tolyp qalady. Demalýshylardyń keıbiri 50-100 metr jerdegi metall konteınerlerge barýǵa erinedi», - deıdi «Býrabaı» memlekettik ulttyq tabıǵı parkiniń qyzmetkerleri.
Sonymen qatar, park qyzmetkerleri demalýshylardy qorshaǵan ortany aıalap, tazalyqty bir sát esten shyǵarmaýǵa shaqyrady.
«Qorshaǵan ortada ómir súre otyryp, tabıǵattyń tamasha sıyn búldirmeý úlken jaýapkershilikti, tipti tazalyq pen sana-sezimdi talap etedi. Sol sebepti tamasha demalystan keıin, sońdaryńyzdan qoqystardy jınap, qoqys jáshikterin durys maqsatta paıdalansańyzdar deımiz. Plastıkalyq shólmek, tamaqtyń qaldyǵy, qarbyzdyń qabyǵy sııaqty iri qoqystardy osyǵan arnalǵan arnaıy metall konteınerine salyp ketýlerińizdi suraımyz. Osy rette: «Tazalyq jınaǵan jerde emes, shashpaǵan jerde bolady» degen qaǵıdany esten shyǵarmaıyq!», - dep túıindedi «Býrabaı» memlekettik ulttyq tabıǵı parkiniń qyzmetkerleri.
Eske sala keteıik, áleýmettik jelide ótken demalys kúnderi Býrabaı kýrortyndaǵy jaǵjaı aýmaǵynda qoqystyń shashylyp jatqandyǵy týraly aqparat taraǵan bolatyn. Elimizdiń eń ásem kýrortynda tazalyqtyń bolmaýy jeli qoldanýshylardyń ashý-yzasyn týdyrǵan edi.