«Býrabaı» ulttyq parkindegi Askanııa buǵylarynyń sany 1,5 myńnan asty

KÓKShETAÝ. QazAqparat - Býrabaı» memlekettik ulttyq tabıǵı parkiniń mamandary júrgizgen sanaq qorytyndysy boıynsha, bıyl qoryqtaǵy Askanııa buǵylarynyń sany 1512 basqa jetti, dep habarlaıdy QazAqparat tilshisi Qazaqstan Respýblıkasy Prezıdenti Іs basqarmasynyń baspasóz qyzmetine silteme jasap.

«Bul ásem janýarlar – bizdiń parktiń maqtanyshy. Eki aıaqty «qasqyrlar» men ańnyń qasqyrynan qorǵamasaq, tabıǵattyń osy qymbat syıynan aıyrylyp qalýymyz op-ońaı. Sol úshin qoryqshylar buǵylardy qysy-jazy syrtynan baqylap, kúzetip júredi, sanaq júrgizedi.

Arqanyń qysy qatal ekenin bilesizder. Orman sharýashylyqtarynyń ár jerinde jergilikti ań-qustar úshin júzden astam naýa qoıylǵan. Qys boıy qoryqshylar sol naýaǵa jem-shóp pen tuz salyp turady. Buǵy-maraldar da úırenip alǵan, naýa qoıylǵan jerlerdiń tóńireginde jaıylady», – deıdi «Býrabaı» MUTP bas ańtanýshy mamany Mırat Beısembaev.

Askanııa buǵylary Ýkraınadaǵy Askanııa-Nova qoryǵynda Qyrym, Kavkaz jáne Vapıtı buǵylaryn býdandastyrý arqyly shyqqan erekshe tuqym ekenin aıta keteıik.

1938-1972 jyldary Qazaqstannyń janýarlar álemin baıyta túsý úshin ózge elderden birqatar ań-qus ákelingen bolatyn. Askanııa buǵysy da bizdiń óńirge Ýkarınadan sol jyldary ákelindi.

Atap aıtqanda, 1963-1966 jyldary Azov-Sıvash qoryǵynan – 58 bas, 1984 jyly – «Askanııa-Novadan» taǵy 2 bas buǵy keldi. Kókshe óńirin jersingen sol 60 buǵy búginde 1512 basqa jetip otyr.

Aıta ketsek, budan buryn bıyl «Býrabaı» ulttyq parkin damytý boıynsha qandaı jumystar atqarylatynyn jazǵan edik.

Foto: «Býrabaı» MUTP fototuzaqqa túsip qalǵan Askanııa buǵylary.