Býrabaı ulttyq parkine kirý tarıfi ózgerdi: Jergilikti turǵyndar tólemnen bosatyldy

<p>BÝRABAI. KAZINFORM &mdash; Bıyl Salyq kodeksinen Erekshe qorǵalatyn tabıǵı aýmaqtardy paıdalanǵany úshin alynatyn tólem respýblıkalyq bıýdjetke túsetini týraly normalar alynyp tastaldy.</p>

Qazir tólem tek qana ultttyq parktiń arnaıy esepshotyna túsedi jáne árbir park óziniń tarıfterin belgileıdi. «Býrabaı» ulttyq parkiniń mamandary jańa tarıf týraly túsindirme jasap, jergilikti turǵyndar múddesi erekshe qarastyrylǵany aıtyldy.

Foto: Vıktor Fedıýnın\ Kazinform

Olardyń aıtýynsha, 2017 jyly engizilgen tarıf 7 jyldan beri alǵash ret ógertilip otyr, jańa baǵa bıyl 26 qarashada kúshine engen. 

Foto: Vıktor Fedıýnın\ Kazinform

− Býrabaı — elimizdegi halyq eń kóp keletin ulttyq park. Bıyl kelgen týrıster sany 1 mıllıonnan asty jáne jyl sanap artyp kele jatyr. Árıne, týrıster kóp bolǵan saıyn jergilikti tabıǵatqa da úlken salmaq túsedi. Qoqys kóbeıedi, topyraq erozııaǵa ushyraıdy, taý-tastar búlinedi. Órt qaýpi kúsheıedi. Jumys kúshin kóbeıtýge týra keledi. Onyń barlyǵy qosymsha shyǵyndy qajet etedi, — deıdi «Býrabaı» MUTP dırektorynyń orynbasary Venera Nuǵmanova tilshilerge bergen suhbatynda.

Osylaısha, park aýmaǵyna jeńil kólikpen kirý quny jumys kúnderi — 0,3 AEK (1107 teńge), demalys jáne mereke kúnderi — 0,4 AEK (1476 teńge) bolyp belgilengen.

Tıisinshe 16 oryndyq avtobýstar úshin kirý aqysy — 1 jáne 1,5 AEK (3692 jáne 5538 teńge), 16-32 oryndyq avtobýstar úshin 2 jáne 2,5 AEK (7384 jáne 9230 teńge), 32-den artyq jolaýshyǵa arnalǵan avtobýstar úshin — 3 jáne 3,5 AEK (11 076 jáne 12 922 teńge).

Foto: Vıktor Fedıýnın\ Kazinform

— «Býrabaı» ulttyq parkiniń aýmaǵynda turatyn, sondaı-aq ulttyq parkpen irgeles eldi-mekenderdiń 26,5 myń halqynan esh tólemaqy alynbaıdy. Olardyń avtokólik nómiri elektrondy bazada tirkelgen. ıAǵnı, jergilikti halyqtyń múddesi eskerildi. Týrısterdiń kelgeni jaqsy, biraq osy jerde ómir súrip jatqan adamdardyń jaǵdaıyn oılaý kerek, — deıdi Venera Nuǵmanova.

Spıker atap ótkendeı, «Býrabaıda» ekojúıeni qorǵaýǵa baǵyttalǵan arnaıy tabıǵat qorǵaý rejımi bar. Ormandy órtten qorǵaý, jańa kóshet otyrǵyzý, ań-qustar men balyqtardy qorǵaý, olarǵa qysqy azyq-túlik ázirleý, qorshaǵan ortaǵa monıtorng júrgizý, bıoqaldyqtardy tazalaý jumystary jyl boıy júredi.

Qazirgi tańda «Býrabaı» parkine kiretin tustarda avtomattandyrylǵan 5 ótkizý-baqylaý beketi jumys istep tur. Tólemdi Kaspi jáne Halyk Bank QR-kodtary arqyly jasaýǵa bolady. 

Aıta keteıik, Abylaı han alańynyń mańynda aqyly avtoturaq jumys istep tur. Bul shara retsiz kólik qoıý, keptelis máselelerin sheshýge baǵyttalǵan.