«Býrabaı» ulttyq parkinde janýarlarǵa qajetti qysqa jem-shóp qory jasalyp jatyr

<p>KÓKShETAÝ. KAZINFORM - &laquo;Býrabaı&raquo; memlekettik ulttyq tabıǵı parki (MUTP) memlekettik ınspektorlary jabaıy jan-janýarlarǵa arnalǵan naýalardy jóndep, shóp shaýyp, aǵash butalarynan býma daıyndap jatyr.</p>

Foto: «Býrabaı» MUTP

«Býrabaı» MUTP baspasóz qyzmetiniń málimetinshe, shóp ulttyq parktiń arnaıy bólingen ýchaskelerinde shabylyp, ashyq alańdarda keptirilip jatyr. Shabyndyq qazan aıyna deıin jalǵasyp, 450 tonnadan astam shóp jınaý josparlanǵan.

Qazirgi tańda 147 myń dana býma ázirlenip, jospar 70 paıyzdan artyq oryndaldy. Qaıyń jáne basqa da aǵashtardyń japyraqtary janýarlardyń as qorytý júıesine paıdaly ekenin aıta ketken jón. Ony keptirip, qurǵaq jerde saqtaý kerek, áıtpese, kógerip ketken japyraqty ańdar jemeıtin kórinedi.

Foto: «Býrabaı» MUTP

«Qys aılarynda jerdi qalyń qar men qatqyl muz basqan kezde janýarlardyń tebindeýi, óz betinshe azyq taýyp jeýi qıyndaıdy. Naýaǵa salynǵan shóp pen mıneral tuz buǵy-maraldarǵa, elikter men bulandarǵa jáne qabandarǵa qystan aman shyǵýǵa kómektesedi. Sol úshin aldaǵy qatal qysqa biz qazirden bastap jan-jaqty daıyndyq júrgizip jatyrmyz», - dedi bas ormanshy, «Býrabaı» memlekettik ulttyq tabıǵı parki dırektorynyń orynbasary Baýyrjan Mahmetov.

Basqa mamandyq ıeleri jaz ýaqyty úshin demalys kezeńi bolsa, ulttyq park ınspektorlary úshin jumystyń eń qyzatyn shaǵy. Jem-shóp daıarlaýdan bólek, ósimdik zııankesterin anyqtaý, aýyrǵan aǵashtardy ýaqtyly emdeý, orman pıtomnıgindegi kóshetterge kútim jasaý, órt sııaqty tabıǵı apattardyń betin qaıtarý sııaqty sharýa shash etekten.

Foto: «Býrabaı» MUTP

Jyl saıyn ulttyq parkke kelýshiler qatary kóbeıip keledi. Sondyqtan aýmaqty qoqystan sanıtarlyq tazartýǵa, halyq arasynda profılaktıkalyq jumys júrgizýge de kóp ýaqyt pen kúsh-jiger kerek.

Aıta ketsek, budan buryn Býrabaıda sırek kezdesetin ósimdik gúldegenin jazǵan edik.