«Býrabaı» ulttyq parki aýmaǵyndaǵy kólderdiń jaǵalaýy tazartyldy

<p>KÓKShETAÝ. KAZINFORM - &laquo;Býrabaı&raquo; memlekettik ulttyq tabıǵı parki aýmaǵynda 200-ge jýyq eriktiniń qatysýymen &laquo;Taza jaǵalaý&raquo; aktsııasy ótip, Shortan, Býrabaı, Úlken Shabaqty, Kishi Shabaqty, Qatarkól jáne Jókeı kólderiniń jaǵalaýlarynan eki tonnadan astam qoqys jınaldy.&nbsp;</p>

«Býrabaı» MUTP baspasóz qyzmetiniń málimetinshe, aktsııa barysynda ulttyq park ınspektorlaryna jergilikti turǵyndar, jalǵa alýshylar men olardyń qyzmetkerleri, sondaı-aq kolledj stýdentteri kómektesti. 

Jınalǵan qoqystyń edáýir bóligi – plastık shólmekter, shyny jáne qańyltyr bankalar, polıetılen paketter. Qoqystyń bul túri qorshaǵan ortaǵa óte qaýipti, óıtkeni olardyń ydyraý protsesi júz jyldan astam ýaqytqa sozylyp, tabıǵatqa úlken zııan keltiredi. 

Foto: «Býrabaı» MUTP

«Taza jaǵalaýlar» aktsııasy bıyl altynshy ret ótkizilip otyr. 

«Bul aktsııa – bizdiń ujymnyń ulttyq park aýmaǵyn taza ustaýǵa baǵyttalǵan turaqty jumysynyń bir bóligi. Mundaı bastamalar kólder men kólderdiń jaǵalaýyndaǵy ekologııalyq jaǵdaıdy jaqsartýǵa ǵana emes, sonymen qatar adamdardyń tabıǵatqa degen qamqorlyǵyn kúsheıtýge yqpal etetinine senimdimiz. Bıyl qorshaǵan ortany qorǵaý boıynsha bizdi qoldaıtyn halyqtyń sany artty. Aktsııaǵa qatysqan barlyq eriktilerge alǵys aıtamyz», - dedi «Býrabaı» MUTP bas ormanshysy Baýyrjan Mahmetov. 

Aıta ketsek, budan buryn QR Prezıdenti Іs Basqarmasyna qarasty «Býrabaı-Damý» JShS ujymynyń 30-dan astam qyzmetkeri «Taza Qazaqstan» jalpyulttyq ekologııalyq aktsııasy aıasynda ótken «Taza beısenbige» qatysqanyn jazǵan edik.