Býrabaı kýrortynda aqyly avtoturaq paıda boldy

<p>BÝRABAI. KAZINFORM &ndash; 1 qarashadan beri Abylaı han alańynyń mańynda aqyly avtoturaq jumys istep tur. Bul sheshim yńǵaıly, qaýipsiz jáne ekologııalyq taza orta qurýǵa baǵyttalǵan.</p>

Turaqta alǵashqy 10 mınýt tegin turýǵa bolady, odan keıingi ár saǵaty - 150 teńge. Aqyly parkıng 150 kólikke eseptelgen jáne táýlik boıy jumys isteıdi, ondaǵy barlyq júıe avtomattandyrylǵan.

− Bul shara eń aldymen júrgizýshilerdiń ýaqytyn tıimdi paıdalanýǵa yqpal etedi dep kútemiz.  Óıtkeni retsiz kólik qoıý saldarynan kóptegen adam bos oryn taba almaı qınalady. Oǵan balama retinde jaqyn mańda 67 orynǵa arnalǵan tegin parkıng te bar. Aqyly parkıngten túsken barlyq qarajat týrıstik aımaqtyń ınfraqurylymyn damytý men abattandyrýǵa jumsalady, − dedi «Býrabaı damý» JShS bas dırektorynyń orynbasary Súleımen Qadyrov agenttik tilshisine bergen suhbatynda. 

Onyń aıtýynsha, aqyly avtoturaq kýrorttyq aımaqqa alǵash ret engizilip otyr. Barlyq jol belgileri men shlagbaýmdar ornatylǵan. 

Sonymen birge múgedektigi bar jandarǵa da arnaıy 4 oryn qarastyrylǵan. 

Aıta keteıik, Býrabaıdaǵy Mýltımedııalyq ınteraktıvti keshenge jańǵyrtýdan ótkennen keıingi jarty jylda 7 myńnan astam qonaq kelgen.