Býrabaı kýrortyna jolaýshylar aǵymy 30%-ǵa artty

<p>ASTANA. KAZINFORM &ndash; Jazǵy maýsymnyń bastalýymen Býrabaı kýrortyna poıyzben saıahattaý týrıster men jergilikti turǵyndar arasynda burynǵydan da tanymal bola tústi. Býrabaıǵa maýsym aıynda Ulttyq tasymaldaýshynyń elektr poıyzdarymen 49 myńnan astam adam tasymaldandy. Bul kórsetkish ótken jylmen salystyrǵanda 30%-ǵa joǵary, ótken jyly temirjol qyzmetin shamamen 34 myń jolaýshy paıdalanǵan bolatyn.</p>

Jolaýshylardyń yńǵaılylyǵy úshin bıyl Ulttyq tasymaldaýshy «Qaraǵandy-Astana-Býrabaı kýrorty» baǵyty boıynsha joǵary jyldamdyqty № 6811/6812 «Astana-Býrabaı kýrorty» ýchaskesindegi elektr poıyzynyń júrý ýaqytyn 2,5 saǵatqa deıin qysqartty. Elektr poıyzy aptasyna bes ret: dúısenbi, sársenbi, juma, senbi jáne jeksenbi kúnderi júredi.

«Sonymen qatar, jazǵy kezeńde № 7509/7510 „Pavlodar-Astana“ joǵary jyldamdyqty elektr poıyzynyń baǵyty Kókshetaý men Býrabaı kýrortyna deıin uzartyldy (poıyz № 6805/6806). Poıyz aptasyna eki ret: juma jáne jeksenbi kúnderi júredi.

Bul sharalar Býrabaı kýrortyna jolaýshylar aǵymynyń artýyna yqpal etti. Bıyl Býrabaıǵa temirjol kóligimen 125 myń jolaýshy tasymaldaý josparlanýda», — dep jazdy QTJ-dan.

Sondaı-aq, Býrabaıǵa kúndelikti № 6829/6830 «Astana-Kókshetaý» júredi. Odan bólek Astana-1 stantsııasynan № 7553/7556, № 6811/6812 «Qaraǵandy-Astana-Býrabaı kýrorty» poıyzdary jáne Nurly jol vokzalynan № 7507/7508 «Astana-Kókshetaý» poıyzy qatynaıdy.

Jolaýshylarǵa qoljetimdi bolý úshin elektr poıyzdarynyń bılet quny 2 271 teńgeden 2 943 teńge aralyǵyn quraıdy. Bıletterdi bilet.railways.kz saıtynda jáne temirjol vokzaldaryndaǵy «Jolaýshylar tasymaly» AQ kassalarynda 10 kúnnen 1 kúnge deıin satyp alýǵa bolady.