Býrabaı kólderi ekojúıesiniń turaqtylyǵyn zertteý jumystary bastaldy

<p>KÓKShETAÝ. KAZINFORM &ndash; Qazaq balyq sharýashylyǵy ǵylymı-zertteý ınstıtýty Soltústik fılıalynyń ǵalymdary &laquo;Býrabaı&raquo; memlekettik ulttyq tabıǵı parkiniń Býrabaı, Úlken Shabaqty, Kishi Shabaqty, Tekekól, Shortan, Qatarkól jáne Jókeı kólderi ekojúıesiniń turaqtylyǵyn zertteý jumysyn bastady.&nbsp;</p>

«Býrabaı» MUTP baspasóz qyzmetiniń málimetinshe, ǵalymdar kólderdiń ıhtıofaýnasyndaǵy balyqtar men basqa da jándikter quramyna, balyq jáne basqa da bıologııalyq resýrstarynyń taralýyna, balyq popýlıatsııalarynyń jaǵdaıyna baǵa berýi kerek. Sondaı-aq sý obektileriniń morfometrııalyq sıpattary men gıdrologııalyq rejımi, sýdyń gıdrohımııalyq quramy, azyq bazasynyń kúıi taldanady.

Foto: «Býrabaı» MUTP

Jınalǵan derekter boıynsha kól resýrstaryn utymdy paıdalaný týraly usynymdar, aıdyndardy qorǵaý jónindegi is-sharalar ázirlenedi. Sporttyq balyq aýlaý kezinde aýlaýǵa ruqsat berilgen balyq kólemi de naqtylanady.

Foto: «Býrabaı» MUTP

«Biz qazir balyqtardyń kóbeıý barysyn, túrlik quramyn, sany men sıpattamalaryn, ólshemdik qurylymyn, jasyn jáne jynystyq quramyn zertteý úshin ıhtıologııalyq materıal jınap jatyrmyz. Zertteý nátıjesi sý aıdyndaryn utymdy paıdalaný jáne olardyń saqtalýyn qamtamasyz etý jónindegi usynymdarǵa negiz bolady», - dedi Qazaq balyq sharýashylyǵy ǵylymı-zertteý ınstıtýty» JShS Soltústik fılıaly tirek pýnktiniń meńgerýshisi Vladımır Kraınıýk.

Foto: «Býrabaı» MUTP

Ulttyq park mamandarynyń aıtýynsha, zertteý jumystary kólderdiń ekojúıesindegi ekologııalyq tepe-teńdikti qalpyna keltirýge jáne saqtaýǵa kómektesedi.

«Bıylǵy jyldyń sońyna deıin biz Úlken Shabaqty kóliniń tuqy tuqymdas balyqtaryn aýlaımyz. Bul shara ekojúıedegi ekologııalyq tepe-teńdikti qalpyna keltirýge jáne saqtaýǵa septigin tıgizedi. Balyq sharýashylyǵy ǵylymı-zertteý ınstıtýtynyń ǵalymdary barlyq kólderge qatysty zertteýlerdiń aıaqtaýyn, jumystyń nátıjesin kútip otyr», - dedi «Býrabaı» MUTP ınjener-ıhtıology Nurman Aıtqojın.

Aıta ketsek, budan buryn Býrabaı kólderi beınebaqylaý kameralarynyń kómegimen baqylanatynyn jazǵan edik.