«Býrabaı kazınosynda bomba»: 393 adam evakýatsııalandy

KÓKShETAÝ. QazAqparat - Býrabaıdaǵy kazınoǵa bomba qoıylǵandyǵy týraly aqparatqa baılanysty 393 adam evakýatsııalandy, dep habarlaıdy QazAqparat tilshisi Aqmola oblystyq Polıtsııa departamentiniń baspasóz qyzmetine silteme jasap.

Vedomstvonyń málimetinshe, 24 tamyz kúni, saǵat 09:49-da Býrabaı aýdandyq polıtsııa bólimine qaýipsizdik qyzmetiniń qyzmetkerinen «CashVille» kazınosynda jarylys bolý qaýpi týraly aqparat tústi.

«Polıtsııa qyzmetkerleri jeke sektordyń aýmaǵyn qorshap, shyǵyp bara jatqan kólikterdi tekserdi. Qazirgi ýaqytta 393 adam evakýatsııalandy. Bul derek aqparatty esepke alý kitabyna tirkeldi. Jarylys tehnıkteri ǵımaratta jarylý qaýpi bar zattardyń bar-joǵyn tekserip jatyr. Sonymen birge kúdiktiniń jeke basyn anyqtaý úshin jedel-izdestirý is-sharalary júrgizilýde», - dedi vedomstvodan.

Osy rettte, Aqmola oblysynyń Polıtsııa departamenti jarylǵysh zat týraly kórineý jalǵan habar bergen adamnyń qylmystyq jaýapqa tartylatynyn eskertedi.

Aıta ketsek, budan buryn Býrabaıdaǵy kazınoda polıtseıler bomba izdep jatqandyǵyn jazǵan edik.