Býrabaı: Qazaqstandyq jas patrıottar akademııasy 3 jyldyǵyn atap ótti

KÓKShETAÝ. QazAqparat - Býrabaıdaǵy «Baldáýren» respýblıkalyq oqý-saýyqtyrý ortalyǵynda Qazaqstandyq jas patrıottar akademııasynyń ashylǵanyna 3 jyl tolýyna oraı «Akademııa kúni» atalyp ótildi, dep habarlaıdy QazAqparat tilshisi ortalyqtyń baspasóz qyzmetine silteme jasap.

Akademııa kúnine «Rýhanı jańǵyrý» baǵdarlamasynyń menedjerleri, oblystyq, qalalyq jáne aýdandyq bilim basqarmalary men bólimderiniń mamandary, ádiskerleri, mektep dırektorlary, bilim berý uıymdarynyń tárbıe jumysy jónindegi orynbasarlary, alǵashqy áskerı daıyndyq uıymdastyrýshy-ustazdary, synyp jetekshileri, muǵalimder, Qazaqstandyq jas patrıottar akademııasy músheleriniń ata-analary, sondaı-aq, patrıottyq baǵytta jumys jasap júrgen eljandy oqýshylar qatysty.

Shara barysynda Qazaqstandyq jas patrıottardy tárbıeleý men osy baǵytta úsh jyldan beri jumys júrgizip kele jatqan Soltústik Qazaqstan, Almaty, Jambyl oblystarynyń ókilderi óz tájirıbelerimen bólisti.

«Jalpy, jas urpaqty tárbıeleýdegi patrıotızmniń eń jaqsy úlgisi mektep qabyrǵasynan bastap týǵan jerdiń tarıhyn oqytýdan kórinis tapsa, bundaı ıgi isterdiń qashanda óz jalǵasyn tabary haq. Týǵan jerdiń ár saıy men qyrqasy, taýy men ózeni kóne tarıhtan taýsylmas syr shertedi. Mysaly, bizdiń ólke - Almaty oblysy, Panfılov aýdany aýmaǵynda zerttelmegen tarıhı nysandar men kóne jádigerler sany óte kóp tipti osyndaı kóneniń kózi bolǵan qundy tarıhı oryndar jergilikti jerdiń memlekettik arheologııalyq tizimine alynbaǵyn, keıbiri kartada da joq.

Sol úshin men jalpy tarıhshy mamandar nazarynan tys qalyp ejelgi qupııalardy baýyryna búkken kóne qalashyq jurttaryn zertteý nysany retinde tańdap aldym. Áli de bizdiń týǵan ólkemizdiń sheńberinde (jalpy qazaq dalasyn aıtpaǵanda) óz zertteýshisin kútip jatqan baǵzy zaman qupııalary jeterlik desek qatelespeımiz», - dep atap ótti tarıhshy, Qazaqstan Jýrnalıster odaǵynyń múshesi, «Jarkent aınasy» gazeti bas redaktordyń orynbasary Qalı Ibraıymjanov.

Aıta keteıik, «Baldáýren» respýblıkalyq oqý-saýyqtyrý ortalyǵynda Qazaqstandyq jas patrıottar akademııasy ashylǵan 3 jyldyń ishinde oǵan 1855 oqýshy múshelikke qabyldansa, búginde olardyń sany artyp otyr. ıAǵnı, Akademııa kúniniń saltanatty ashylý barysynda Soltústik Qazaqstan, Almaty, Qyzylorda jáne Jambyl oblystarynan kelgen baldáýrendikter arasynan 9 úmitkerge «Eljandy patrıot» tósbelgileri, kýálikter men sertıfıkattar berildi.