Býrabaı aýdanynda onlaın qyzmet kórsetetin «Servıstik ákimdik» ashyldy
«Servıstik ákimdiktiń» ashylýyna jergilikti Sybaılas jemqorlyqqa qarsy qyzmet basshysynyń birinshi orynbasary Arman Berdalın jáne Býrabaı aýdany ákimi Áset Muzdybaev qatysyp, sóz sóıledi.
Vedomstvodan atap ótkendeı, endi jergilikti turǵyndar qurylys, turǵyn úı-kommýnaldyq sharýashylyq, jer qatynastary, aýyl sharýashylyq, bilim berý, sondaı-aq áleýmettik salalarynda ózderin qyzyqtyratyn máseleler boıynsha keńester men qyzmetterdi «bir tereze» qaǵıdaty boıynsha ala alady.
Sonymen qatar, aýdan ákimi men onyń orynbasarlary Open space formatyndaǵy kabınette apta saıyn azamattardy jeke qabyldaıdy. Aıta ketý kerek, tótenshe jaǵdaı kezinde azamattardy qabyldaý, keńes berý jáne memlekettik qyzmetterdi kórsetý onlaın rejımde júrgiziledi.
«Barlyǵymyz biletindeı, tótenshe jaǵdaı kezinde memlekettik organdar men uıymdar óz jumysyn qashyqtan júrgizetin formatqa aýystyra otyryp, halyqqa túrli qyzmetter kórsetýdi jalǵastyrýda. Servıstik ákimdikter qyzmetterdi alýdyń jedeldigi men yńǵaılylyǵyn qamtamasyz etýge, bıýrokratııa men sybaılas jemqorlyq táýekelderin qysqartýǵa, sondaı-aq halyqtyń memlekettik organdarǵa degen senimin arttyrýǵa múmkindik beredi dep esepteımiz. Aǵymdaǵy jyldyń sońyna deıin oblystyń barlyq óńirlerinde uqsas Servıstik ákimdikterdi ashý josparda bar», - dep atap ótti óz sózinde Arman Berdalın.
Esterińizge sala keteıik, buǵan deıin Memleket basshysy qol jetimdilik, ashyqtyq pen aıqyndyq qaǵıdattaryna negizdeletin jergilikti atqarýshy bılik pen halyqtyń ózara is-qımylynyń jańa formatyna kóshýdi tapsyrdy.