Buny Qazaqstannyń «Boks kúni» dese de bolady – mınıstr álem chempıonatyndaǵy jetistikter jaıly

ASTANA. QazAqparat – Keshegi jetistikti – tarıhı uly jeńis dep aıtýǵa bolady. Búgin elorda áýejaıynda bokstan álem chempıondaryn qarsy alý saltanatynda Mádenıet jáne sport mınıstri Ashat Oralov osylaı aıtty, dep habarlaıdy QazAqparat tilshisi.

«Olar osy kúnniń batyrlary. Kesheden beri bizdiń batyrlarymyz kásibı boksta da jeńiske jetip jatyr. Beıresmı aıtsaq, Qazaqstanda «Boks kúni» boldy. Osy jyldyń kúzinde Azııa chempıonaty ótedi. Keler jyl – úlken synaq jyly. Parıjde Olımpıada ótedi. Sol saıystarǵa daıyndalyp, sportshylardy qoldaýymyz kerek», - dedi Ashat Oralov.

Sondaı-aq mınıstr boksshylarymyzdyń álem chempıonatynda kórsetken nátıjesi tarıhı jeńis ekenin atap ótti.

«Halqymyz bokstyń «altynyna» úırenip qaldy. Alaıda, biraz jyl «altyn» bolmaı qaldy. Keshegi jetistikti – tarıhı uly jeńis dep aıtýǵa bolady. Bolashaqta bul jetistikpen toqtamaımyz», - dep málim etti vedomstvo basshysy.

Qosa ketsek búgin jeńimpazdardyń alǵashqy legi elge oraldy. Chempıondardyń ekinshi toby – Sanjar Táshkenbaı men Nurbek Oralbaı Astana ýaqytymen saǵat 16:00-de elordaǵa qonady.

Aıta keteıik, Qazaqstan quramasy Ózbekstanda ótken álem chempıonatyn 4 altyn, 1 kúmis medalmen aıaqtady.