Býndestag Sholts úkimetine senimsizdik votýmyn qabyldady

<p>ASTANA. KAZINFORM &ndash; Býndestag depýtattarynyń kópshiligi Olaf Sholts úkimetine senimsizdik votýmyn qoldady, dep habarlaıdy <a href="https://www.bbc.com/russian/articles/c0rnvxp4kg9o" target="_blank" rel="noopener">BBC.</a></p>

Bul máseleni Germanııa kantsleriniń ózi koalıtsııasy ydyraǵannan keıin parlament aldynda kóterdi. Germanııada merziminen buryn saılaý 23 aqpanǵa belgilengen.

Endi el prezıdenti Frank-Valter Shtaınmaıer 21 kún ishinde Býndestagty taratý-taratpaý týraly sheshim qabyldaýy tıis. Ol buǵan deıin «elge turaqty kópshilik pen áreket ete alatyn úkimet qajet» dep aıtqan bolatyn, sondyqtan Shtaınmaıer Býndestagty taratady degen boljam bar.

Sodan keıin 60 kún ishinde Germanııada jańa saılaý ótedi.

Saýalnamalarǵa sáıkes, Frıdrıh Merts basqaratyn HDO/HSO hrıstıandyq partııalary koalıtsııasynyń merziminen buryn saılaýda jeńiske jetý múmkindigi joǵary: ony saılaýshylardyń 30%-dan sál astamy qoldap otyr. Merts, atap aıtqanda, áskerı shyǵyndardy kóbeıtýge jáne zańsyz mıgranttar úshin shekarany jabýǵa ýáde berip otyr. Ol sondaı-aq Ýkraınaǵa Taurus zymyrandaryn jetkizý múmkindigin joqqa shyǵarmaıdy – Sholts pen onyń partııasy buǵan qarsy.

Ekinshi orynda, saýalnamaǵa sáıkes, ońshyl popýlıstik «Germanııa úshin balama» partııasy bolýy múmkin. Oǵan saılaýshylardyń 20 paıyzǵa jýyǵy daýys berýge daıyn. Degenmen, basqa partııalar dástúrli túrde «Balamamen» jumys isteýden bas tartady, sondyqtan partııanyń jańa koalıtsııaǵa qosylýy ekitalaı.

Sotsıal-demokratııalyq partııa, saýalnamaǵa sáıkes, shamamen 17%, al jasyldar - 11% daýys jınaı alady.

Germanııa Konstıtýtsııasy Býndestagtyń óz betimen taraýyna ruqsat bermeıdi. Sondyqtan merziminen buryn saılaý ótkizýdiń jalǵyz joly – úkimetke senimsizdik votýmyn berý.

Osyǵan deıin habarlaǵanymyzdaı, Germanııada eńbek etip, qoǵamǵa sińgen sırııalyq azamattar ary qaraı da elde qala berýine bolady. Osy aptada kantsler Olaf Sholts halyqqa úndeýinde osylaı dep málimdedi.