Býndestag delegatsııasy Qazaqstan-Germanııa qarym-qatynasy máselesin talqylaıdy - SІM

ASTANA. QazAqparat – Elimizdegi Germanııa Býndestagynyń delegatsııasy saparmen keldi. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«20 aqpanda Qazaqstanǵa «Germanııa - Ortalyq Azııa» parlamenttik tobynyń músheleri quramynda Germanııa Federatıvtik Respýblıkasy Býndestagynyń resmı delegatsııasy keldi. Sapar aıasynda top tóraǵasy Oıgen Shmıdt pen onyń áriptesteri Tomas Baraıss, Krıstıan Gorke jáne Krıstıan Shraıder Memlekettik keńesshi Erlan Qarınmen, Premer-Mınıstrdiń birinshi orynbasary Roman Sklıarmen, sondaı-aq Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Asqar Shákirovpen kezdesti», - dedi resmı ókil vedomstvoda ótken aptalyq brıfıng barysynda.

Onyń atap ótýinshe, Germanııa Býndestagy depýtattarynyń Qazaqstan Syrtqy ister mınıstriniń orynbasary Roman Vasılenkomen kezdesýi jáne onyń barysynda Qazaqstan-Germanııa qarym-qatynasy men halyqaralyq kún tártibindegi basym máseleler boıynsha pikir almasýy josparlanǵan.

«2023 jylǵy 19 naýryzda ótetin QR Parlamenti Májilisiniń saılaýy turǵysynda nemis tarapy «Ádiletti Qazaqstandy» qurý aıasyndaǵy saıası jáne áleýmettik ózgeristerdiń aýqymdy baǵdarlamasy týraly aqparatty qyzyǵýshylyqpen qabyldady. Taraptar Qazaqstan men Germanııa arasyndaǵy tyǵyz saıası dıalogty quptady», - dedi Aıbek Smadııarov.