Bulaq kózinen Taıqazanǵa: Qazaqstannyń ár óńirindegi qasıetti sý Astanaǵa jetkiziledi

<p>ASTANA. KAZINFORM — 5-shi Dúnıejúzilik kóshpendiler oıyndary aıasynda 6 qyrkúıek kúni Astanada teatrlandyrylǵan qoıylymmen «Birlik Kerýeni» saltanatty is-sharasy ótedi, dep habarlaıdy elorda ákimdiginiń resmı saıty.</p>

«Birlik Kerýeni» — Qazaqstannyń 20 óńirinen respýblıkanyń barlyq turǵyndaryn biriktiretin jáne elimizdiń birligi men mádenı áralýandyǵy sımvolyna aınalatyn 5-shi Dúnıejúzilik kóshpendiler oıyndarynyń bóligi bolyp sanalatyn mańyzdy mádenı oqıǵa.

«Birlik Kerýeni» is-sharasy ótkiziletin kúni óńirlerdiń ókilderi basqaratyn kerýen — bul sportshylar, qoǵam qaıratkerleri, túrli oblystardan kelgen óńirlerdiń batyrlary Astanaǵa Qazaqstannyń qasıetti kózderinen sý jetkizedi.

Elimizdiń túkpir-túkpirinen jınalatyn sý Astanadaǵy taıqazanda oıyndardyń ashylý kúni qosylyp, birliktiń basty sımvolyna aınalady.

Esterińizge sala keteıik, elimizdiń ár óńiriniń qasıetti bulaǵynda torsyqty toltyrý úshin sý tartylǵan. Dál osy sý Dúnıejúzilik Kóshpendiler oıyndarynyń ashylý saltanatynyń negizgi elementi bolady.

Astanada sý alý rásimin ótkizý úshin Esil ózeniniń kózi tańdaldy. Esil — elordanyń basty sý arterııasy. Ózen búkil qala arqyly ótedi, Astananyń kórikti jerleriniń biri bolyp sanalady.

Aıta keteıik, oıyndar ashylǵan kúni kıeli sýǵa toly torsyqtary bar túrli óńirlerden kelgen batyrlar quramyndaǵy kerýen oıyndardyń ashylý saltanatyna jarqyn sherýmen ótedi.

Óńirdiń dástúrleri men stılıstıkasymen bezendirilgen kerýen quramynda Astanaǵa sý ydysynan basqa, oıyndardyń mádenı baǵdarlamasyna qatysatyn shyǵarmashylyq ujymdar jiberiledi.

«Birlik Kerýeni» ótkiziletin kúni «Royal Beats» barabanshylar ansambli, «Joshy» toby, sondaı-aq Qazaqstannyń basqa da ártisteri kontserttik baǵdarlama usynady. Oryndaýshylar qatarynda qazaqstandyq estrada juldyzdary: ARO, Qýandyq Rahym, Marjan Arapbaeva, Ǵazızhan Shekerbek, Aqbota Kerimbekova, Ayree, Mıras Júginisov bar.

6 qyrkúıek kúni saǵat 17:00–de EKSPO aýmaǵynda (saǵat 16.00-den bastap dıdjeı oınaıdy, sondaı-aq qatysýshylar úshin vıktorınalar ótkiziledi) is-shara resmı túrde bastalady.

«Birlik Kerýeni» ótkizilýine baılanysty saǵat 13:00–den 21:00–ge deıin Túrkistan jáne Aqmeshit kóshelerindegi EKSPO mańyndaǵy joldardyń bir bóligin ýaqytsha jabý josparlanýda.