Bul joly daýys sanaý protsedýrasy uzaqqa sozylady – OSK

ASTANA. QazAqparat – Májilis jáne máslıhattar depýtattaryn saılaýdan keıingi daýystardy sanaý protsesi ádettegiden uzaǵyraq bolmaq. Bul týraly Ortalyq saılaý komıssııasy tóraǵasynyń orynbasary Konstantın Petrov málim etti, dep habarlaıdy QazAqparat tilshisi.

«Daýys berý jergilikti ýaqyt boıynsha saǵat 07:00-de bastalyp, keshki saǵat 20:00-de aıaqtalady. Daýys berý rásimi aıaqtalǵan soń, olardy sanaý bastalady. Bul joly daýystardy sanaý protsedýrasy ádettegiden áldeqaıda uzaǵyraq bolmaq. Sebebi bıýlletender sany ádettegiden kóp. Biraq, zań boıynsha daýystardy sanaý 12 saǵattan aspaýy tıis», - dedi Konstantın Petrov OSK-da ótken brıfıngide.

Onyń aıtýynsha, daýystardy sanaý barlyq saılaý ýchaskelerinde tańǵy 8:00-de aıaqtalady.

«Sodan soń saılaý ýchaskeleri ózderiniń qorytyndylary týraly hattamalaryn tıisti aýmaqtyq okrýgtik komıssııalarǵa jiberedi. Biz 20 naýryzda ol derekterdi jarııalaımyz. Degenmen tańerteńgi saǵat 10:00 nemese 11:00-de dep ýáde bere almaımyz», - deıdi ol.

OSK tóraǵasynyń orynbasary usynǵan málimetke sáıkes, respýblıkalyq mańyzy bar qalalarda (Astana, Almaty jáne Shymkent) daýys berý tórt bıýlleten boıynsha sanalady. Onyń ekeýi Parlament Májilisi depýtattaryn saılaý jáne ekeýi máslıhattar boıynsha. Al 17 oblysta daýys berý bes saılaý bıýlleteni boıynsha ótpek. Onyń ekeýi Májilis boıynsha, ekeýi oblystyq máslıhattar boıynsha jáne bireýi aýdandyq nemese qalalyq bıýlletender.