Bul sharalardan eshqandaı nátıje joq: Berdibek Saparbaev óńirdegi assambleıanyń jumysyn synady
Basqosý barysynda Jambyl oblysy QHA tóraǵasynyń orynbasary, hatshylyq meńgerýshisi Marjan Qojaeva óz baıandamasynda bıyl 21 myń adamnyń qatysýymen 202 is-shara uıymdastyrylǵanyn jetkizdi.
«Bul sharalardyń nátıjesi qaıda? Eshqandaı oń ózgeristerdi baıqamadym. Bári sol qalpynda. Turmystyq janjaldarǵa ultaralyq sıpat berýge daıyn adamdar áli de kezdesedi. Bul jergilikti jerde tıisti jumys óz deńgeıinde júrgizilip jatqan joq degen sóz», - dedi oblys ákimi.
Ol «Qoǵamdyq kelisim» KMM men Analar keńesiniń qyzmetiniń nátıjesizdigin alǵa tartty.
«Qoǵamdyq kelisim» KMM shtatynda 40 adam bar. Olardyń nemen aınalysyp jatqany túsiniksiz. Olar qarapaıym is-sharalardy uıymdastyrý, sany kún saıyn kóbeıip otyrǵan mádenıet jáne sport nysandaryn tıimdi paıdalaný boıynsha áreket etpeıdi. Bul jumystar óz deńgeıinde oryndalar bolsa ol ultaralyq kelisimdi nyǵaıtý baǵytyndaǵy sátti qadamdardyń biri bolar edi», - dedi Berdibek Saparbaev.
Sondaı-aq, jıynda Analar keńesi óz mindetin tolyq oryndaı almaı otyrǵany, aǵa býynnyń bala tárbıesine atsalyspaıtyny aıtyldy.
Berdibek Saparbaev aýyldarda turaqty túrde saýalnama júrgizip, turǵyndardy qandaı máseleler tolǵandyratynyn anyqtaýdy tapsyrdy.
Óz kezeginde QHA hatshylyǵynyń jáne «Qoǵamdyq kelisim» KMM qurylymy men fýnktsııalary qaıta qaralady.
Keńes barysynda etnomádenı birlestikterdiń ókilderi de óz oılaryn ortaǵa saldy. «Vynhýa» dúngen qaýymdastyǵynyń tóraıymy Aısha Idybo etnomádenı birlestikter ultaralyq kelisimdi nyǵaıtýǵa jáne ulttyq qundylyqtardy nasıhattaýǵa óz úlesin qosýǵa tyrysyp jatqandyǵyn tilge tıek etti. «Vynhýa» qaýymdastyǵynyń jastar qanatynyń músheleri, dúngen ultynyń 175 pedagogy memlekettik tildi meńgergen. Jańa oqý jylynan bastap barlyq 1 synyp oqýshylary men balabaqshalardaǵy oqytý memlekettik tilde júrgizilmek.
Berdibek Saparbaev dúngen qaýymynyń ókilderine Maqtaaral halqyna kórsetken kómegi úshin alǵys aıtty.
Sondaı-aq, «Ahyska» túrik etnomádenı ortalyǵy fılıalynyń tóraǵasy Mahmutjon Davrıshev, «Barbang» kúrdter qaýymdastyǵy fılıalynyń tóraǵasy Latıf Aıdarov óz oılaryn bildirdi.
«Halyqtyń ál-aýqaty ekonomıkaǵa, ekonomıkanyń damýy – turaqtylyqqa, al turaqtylyq elimizde turatyn barlyq adamdardyń ózara kelisimi men tatýlyǵyna baılanysty. Biz birge bolsaq, talaı asýlardy baǵyndyramyz, Qazaqtar «Birlik bar jerde – tirlik bar» dep beker aıtpaıdy. Biz árqashan tatýlyq pen birlikte ómir súrdik. Jyldar boıy qalyptasqan dúnıeden bir sátte aıyrylyp qalýǵa jol berilmeıdi. Mundaı oqıǵalar qaıtalanbas úshin aqsaqaldardyń tutas bir ulttyń tárbıesine jaýapkershilikpen qaraıtyn asyl dástúrimizdi qaıta jandandyrý qajet. Qazaqstanda júzden astam ulttar men ulystar turady. Bizdiń elimiz – dostyq «zerthanasyna» aınalǵan. Tatýlyq pen yntymaqty saqtaý – bizdiń óskeleń urpaq aldyndaǵy mindetimiz», - dep túıindedi oblys ákimi.