Bul saılaýda qoǵamdyq baqylaý deńgeıi aıtarlyqtaı joǵary – halyqaralyq baıqaýshy
«Biz - Qazaqstandaǵy saılaýdy baqylaıtyn resmı halyqaralyq baıqaýshylarmyz. Jalpy saılaýdy baıqaý isimen Reseıde de, basqa shet elderde de 8 jyldan beri aınalysyp kelemiz. Qazaqstan men Reseıdiń parallel jolmen kele jatqany meni qýantady. Bizdiń burynnan bergi seriktesimiz - QR Azamattyq alıansynyń da aýqymdy jumys atqarǵany kóńilimizden shyǵyp otyr. Munda (Beıpartııalyq saılaýdy baıqaý ortalyǵyna) shynynda da kóp aqparat kelip túsetinin, saılaý ýchaskelerinde ne bolyp jatqanyn osynda baqylaýǵa bolatynyn kórdik. Bul - durys qadam. Baýyrlas Qazaqstandaǵy saılaýdy baıqaý isi tolyqqandy júrgizilip jatqanyna qýanyshtymyz», - dedi RF Qoǵamdyq palatasynyń múshesi ári daýys berý boıynsha úılestirý keńesiniń basshysy Maksım Grıgorev.
RF Qoǵamdyq palatasynyń múshesi Artem Kırıanov ta pikirin ortaǵa saldy.
«Beıpartııalyq saılaýdy baıqaý ortalyǵynyń basshylyǵymen kezdese otyryp, qoǵamdy saılaýǵa tartyp, baıqaýshylardy úıretý jaǵynan Qazaqstanda senýge turarlyq azamattardyń baryna qýanyp otyrmyz. Qoǵam ókilderinen eki adam ár ýchaskede baıqaý isine qatysa alady eken. Daıyndyq jumystarynyń materıaldarymen, oqytý semınarlarynyń baǵdarlamasymen tanysa kele qoǵamdyq baqylaý deńgeıi aıtarlyqtaı joǵary ekenin baıqaýǵa bolady», - dep atap ótti spıker.
Óz kezeginde Beıpartııalyq saılaýdy baıqaý ortalyǵynyń basshysy ári Qazaqstan Azamattyq alıansynyń prezıdenti Baný Nurǵazınova atqarylyp jatqan jumystarǵa toqtaldy.
«Buǵan deıin birneshe ret aıtqanymdaı, 1 jeltoqsannan bastap Beıpartııalyq saılaýdy baıqaý ortalyǵy baıqaýshylardy daıyndaý isimen aınalysyp keledi. Onyń ústine bizdiń baıqaýshylar qalalarda ǵana emes, elimizdiń barlyq óńirinde jumys júrgizedi. Qazaqstanda 10 myńǵa tarta saılaý ýchaskesi bar. Árbir ýchaskege baıqaýshylarymyzdy qoıǵymyz keledi», - dedi Baný Nurǵazınova.
Aıan Bekenuly