Bul múmkindikti kóp kúttim, saılaýaldy baǵdarlamam daıyn – Qaraqat Ábden
«Búgin ómirimde mańyzdy qadam jasadym. Prezıdenttikke kandıdat retinde tirkelip, kýálik aldym. Osy oraıda maǵan qoldaý tanytqan jandarǵa alǵys aıtamyn. Sondaı-aq, meniń shtabym jáne kásibı áleýmettik jumysshylar birlestigine rızashylyǵym sheksiz. Búginde saılaýaldy baǵdarlamam daıyn. Taıaýda kópshilikke tanystyramyn», - dedi Qaraqat Ábden OSK-da ótken baspasóz máslıhatynda.
Sondaı-aq, kandıdat úgit-nasıhat jumysynyń daıyndyq barysyna toqtaldy.
«Iá, úgit-nasıhatqa daıyndalýǵa ýaqyt az. Degenmen zań bar. Saıasatker kez kelgen jaǵdaıǵa daıyn bolýy tıis. Elimizdiń barlyq óńirinde shtab jumys isteıdi. Barynsha tyrysamyz. Saılaýaldy úgit-nasıhat jumysyn joǵary deńgeıde uıymdastyramyz, oǵan senimdimin. Men bul múmkindikti kóp kúttim. Sebebi men alǵa qoıyp otyrǵan máseleler joǵary deńgeıde qaralýy kerek. Meniń áıel kandıdat retinde tirkelip, trıbýnada sóılep turǵanymnyń ózi biraz dúnıeden habar beredi. Elimizde genderlik tepe-teńdik bar. Árıne, jeńiske umtylamyn jáne ózime senimdimin», - deıdi ol.
Buǵan deıin habarlaǵanymyzdaı búgin ortalyq saılaý komıssııasy Qaraqat Ábdendi prezıdent saılaýyna kandıdat retinde tirkedi.