Bul másele áli de ózekti – Saıasat Nurbek jataqhana tapshylyǵy týraly

ASTANA. QazAqparat – Bıyl jataqhana tapshylyǵy óte ózekti másele boldy jáne ol áli de sheshilmedi. Bul týraly QazAqparat tilshisiniń saýalyna jaýap bergen Ǵylym jáne joǵary bilim mınıstri Saıasat Nurbek málim etti.

«Bıyl jataqhana máselesi qatty kóterildi jáne ol áli basylmady. Nege deseńiz, stýdentterdiń sany ósip jatyr. Qazaqstanda demografııalyq dúmpý zor. Jalpy, jyldyń basynda 87 myń jataqhana orny tapshy boldy. Qabyldanǵan jedel sharalardyń arqasynda, ıaǵnı 3-4 aıdyń ishinde biz muny 75 myńǵa azaıttyq», - dep jaýap berdi Saıasat Nurbek tilshi saýalyna oraı.

Mınıstrdiń aıtýynsha, oryn tapshylyǵy máselesi elimizdegi 4 qalada óte ózekti. Al, qalǵan óńirlerde bos oryndar bar.

«Bul másele barlyq óńirde ózekti emes. Tek Almaty men Astanada. Óńirlerdegi jataqhanalarda 14 myń bos oryn bar. Mysaly, qazir Óskemende 600 tósek oryn bos tur. Sol sııaqty Pavlodar, Qaraǵandy qalalarynda da bos oryndar bar. Bastysy, osy eń úlken eki qalanyń máselesin sheshý bolyp otyr. Sosyn Shymkent jáne Aqtóbe tur. Osy tórt qalada jetispeýshilik bar», - dedi mınıstr.

Eske sala keteıik, buǵan deıin almatylyq stýdentterdiń 54%-y ǵana jataqhanamen qamtylǵanyn jazyp edik.