Bul marapat búkil ázerbaıjan halqyna degen qurmettiń belgisi dep bilemin - Ilham Álıev

BAKÝ. QazAqparat – Memleket basshysy Qazaqstan Respýblıkasy men Ázerbaıjan Respýblıkasy arasyndaǵy ekijaqty saıası, ekonomıkalyq jáne mádenı qatynastardy nyǵaıtýǵa jáne damytýǵa qosqan aıryqsha úlesi úshin Ázerbaıjan Respýblıkasynyń Prezıdenti Ilham Alıevti «Altyn Qyran» ordenimen nagradtady, dep habarlaıdy QazAqparat Aqordaǵa silteme jasap.

«Qurmetti Ilham Geıdar oǵlý, búgin men sizdiń elińizge resmı saparmen kelip otyrmyn. Bizdiń shaǵyn quramdaǵy kelissózimiz óte nátıjeli boldy. Meniń saparymnyń baǵdarlamasynda sizdi Qazaqstan Respýblıkasynyń eń joǵary «Altyn Qyran» ordenimen marapattaý rásimi de qarastyrylǵan.

Qazaqstanda sizdi kórnekti memleket qaıratkeri retinde biledi, qurmetteıdi. Búkil álemge tanymal tulǵa retinde syılaıdy. Ázerbaıjandy tarıhı jeńiske jetkizgen, BUU Qaýipsizdik Keńesiniń qararlaryna sáıkes, terrıtorııalyq tutastyǵyn qalpyna keltirgen ákelgen adam retinde men búgin bizdiń jeke kezdesýimizde sizdi quttyqtadym.

Siz memleketterimizdiń kópjaqty, kópqyrly yntymaqtastyǵyn damytýǵa zor úles qosyp kelesiz. Barsha qazaq halqynyń atynan qurmet belgisi retinde búgin sizge «Altyn Qyran» ordenin tabys etkim keledi», - dedi Prezıdent Qasym-Jomart Toqaev.

Ázerbaıjan Respýblıkasynyń Prezıdenti Ilham Álıev bul marapatty búkil ázerbaıjan halqyna degen qurmettiń belgisi dep qabyldaıtynyn jetkizdi.

«Biz úshin baýyrlas el Qazaqstannyń eń joǵary ordenimen meni marapattaýdy qajet dep sanaǵanyńyzdy maqtan tutamyn. Men óz tarapymnan aldaǵy ýaqytta da dostyq jáne baýyrlastyq qarym-qatynasymyzdy damytýǵa úles qosý úshin barlyǵyn jasaımyn.

Bizdiń halyqtarymyzdy tarıhymyz, ortaq tamyrymyz baılanystyrady. Búgingi tańda egemendik jolymen senimdi qadam basyp kele jatqan eki táýelsiz memleket – Qazaqstan men Ázerbaıjan ekonomıkalyq damýdyń jáne áleýmettik máselelerdi sheshýdiń joǵary qarqynyn kórsetip keledi. Álemdik arenada bizdiń elderimizdiń bedeli artyp keledi.

Men bul marapatty búkil ázerbaıjan halqyna degen qurmettiń belgisi dep bilemin. Sizdiń qolyńyzdan osy marapatty alý men úshin zor abyroı.

Siz júzege asyryp jatqan reformalar kýrsyn tolyq qoldaıtynymdy taǵy bir ret aıtqym keledi. Siz júrgizip otyrǵan saıasat Qazaqstan halqynyń ulttyq múddesine tolyq jaýap beredi. Alǵa qoıǵan maqsattaryńyzdyń bári oryndalatynyna senimdimin», - dedi Prezıdent Ilham Álıev.

Foto: akorda.kz