Bul bizdiń tájirıbe – Georgıı Kan «Reseı halqy assambleıasynyń» qurylýy jaıly

NUR-SULTAN. QazAqparat – Reseı prezıdenti Vladımır Pýtınniń «Reseı halqy assambleıasyn» memlekettik-qoǵamdyq uıym retinde qurý týraly jarlyǵy –Qazaqstannyń tájirıbesine negizdelip otyr. Professor, tarıh ǵylymdarynyń doktory, Almatydaǵy káris ulttyq ortalyǵy tóraǵasynyń orynbasary Georgıı Kan osylaı pikir bildirdi, dep habarlaıdy QazAqparat tilshisi.

«Álbette Qazaqstan halqy assambleıasy belgili bir dárejede óz rólin atqardy. Ol shıelinis kezinde adamdardy tynyshtandyryp, ulttyq saıasatty ınstıtýtsıonaldyq dárejege jetkizdi. Bul rette men Reseı prezıdenti Vladımır Pýtınniń «Reseı halqy assambleıasyn» memlekettik-qoǵamdyq uıym retinde qurý týraly jarlyqqa qol qoıǵanyn erekshe qyzyǵýshylyqpen qabyldadym. Bul – bizdiń tájirıbe. Biz ol jaqta Reseı halqy assambleıasy bolǵanyn burynnan bilemiz. Biraq osy jolǵy dáreje múlde bólek. Reseı Federatsııasy da ultaralyq qarym-qatynasty retteýde memlekettik-qoǵamdyq uıymnyń rólin kúsheıtý jolyn tańdady. Meniń oıymsha, bul – jarqyn mysal», - dedi Georgıı Kan QHA Ǵylymı-sarapshylyq keńesiniń keńeıtilgen otyrysynda.

Eske sala ketsek elordada búgin «QR Tuńǵysh Prezıdenti – Qazaqstan halqy Assambleıasy Tóraǵasy Nursultan Nazarbaevtyń birlik pen kelisimdi nyǵaıtý jónindegi saıasaty» taqyrybynda QHA Ǵylymı-sarapshylyq keńesiniń keńeıtilgen otyrysy ótken bolatyn.