Buqtyrmaǵa tógilgen munaı: Sý qoımasynan maıly daq tabylyp, ekologııalyq tekserý bastaldy

ÓSKEMEN. QazAqparat – Shyǵys Qazaqstan oblysyndaǵy Buqtyrma sý qoımasynan maıly daq tabylyp, ekologııalyq tekserý bastaldy, dep habarlaıdy QazAqparat tilshisi.

Áleýmettik jelide Shyǵys Qazaqstan oblysyndaǵy Buqtyrma sý qoımasyna munaı tógilgeni týraly aqparat taraǵan bolatyn.

Osyǵan oraı óńirlik ekologııa departamentiniń mamandary tekserý júrgizdi.

«Barlaý barysynda rasymen de Buqtyrmadan maıly daq tabyldy. Aldyn ala derek boıynsha buǵan sý kóliginen janar-jaǵarmaıdyń aǵýy sebep bolǵan. Qazirgi ýaqytta Ulan jáne Altaı aýdandyq polıtsııa bóliminiń qyzmetkerleri sý kóligin anyqtaý jumysyn júrgizip jatyr», - dep habarlady departamenttiń baspasóz qyzmetinen.

Ekologııa departamentiniń mamandary oqıǵa ornynan sý synamasyn aldy.

Daqtyń naqty neden paıda bolǵany zerthanalyq tekserýlerden keıin belgili bolmaq.