Buqtyrmaǵa batyp bara jatqan 13 jastaǵy jetkinshek qutqaryldy

ÓSKEMEN. QazAqparat – Shyǵys Qazaqstan oblysy Altaı aýdanyndaǵy Buqtyrma sý qoımasynda 13 jastaǵy jetkinshek sýǵa batyp kete jazdady. Oǵan Tótenshe jaǵdaılar departamentiniń demalysta júrgen qyzmetkeri kómekke kelip úlgergen, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Altaı aýdany Oktıabr kentindegi №20 órt sóndirý bólimi bastyǵynyń orynbasary Elaman Nýkýshev qyzmetten bos ýaqytynda Buqtyrma sý qoımasyna demalýǵa kelgen. Bir kezde ol mańaıdaǵy adamdardyń aıqaıyn estidi.

«Belgili bolǵandaı, sýda basqa balalarmen oınap júrgen 13 jastaǵy jetkinshek kenetten kóterilgen tolqynnyń astynda qalyp qoıǵan. Týystary jaqyn jerde bolgan, biraq júze almaıtyndyqtan kómek surap qatty aıqaılaı bastady. Elaman esh oılanbastan sýǵa sekirip, batyp bara jatqan balaǵa jetip, aman alyp qalǵan», - delingen aqparatta.

Týystarynyń aıtýynsha, bala Semeı qalasynan demalýǵa kelgen.

«Elaman Nýkýshev azamattyq qorǵaý organdarynda 2014 jyldan beri jumys isteıdi. Málik Ǵabdýllın atyndaǵy azamattyq qorǵaý akademııasyn bitirgen. Bala kezinen qutqarýshylar qatarynda bolýdy armandady. Ol adam ajaldan alǵash ret arashalap turǵan joq. 2022 jyly Oktıabrskıı aýylynda bolǵan órt kezinde egde jastaǵy áıeldi qutqaryp qalǵan bolatyn», - delingen habarlamada.