Buqtyrmadaǵy kópir qurylysyna bıyl 1 mlrd teńge bólindi
Prezıdent Qasym-Jomart Toqaevtyń tapsyrmasymen Shyǵys Qazaqstandaǵy Kúrshim men Kókpekti aýdandaryn jalǵaıtyn «Qyzyl tý» ótkeline kópir salynatyny belgili.
Bıyl osy maqsatta oblystyq bıýdjetten 1 mlrd teńge bólingen. Bul jaıly oblys ákimi Danıal Ahmetov Facebook paraqshasynda jazdy.
«Kúrshim aýdanynyń ákimi Dýlat Qajanovtyń esep berý kezdesýine qatystym. Kezdesý barysynda turǵyndar shekaralyq aýyldardy damytýǵa baǵyttalǵan keshendi jospar aıasynda atqarylǵan jumystarǵa oń baǵasyn berdi. Sondaı-aq bıyl sheshilýi tıis birqatar ózekti máselelerdi kóterdi. Máselen Uranhaı aýylyna mektep salý. Bul rette byltyr jobalyq-smetalyq qujattama ázirlengen, osy aıda saraptama aıaqtalady. Aýdandaǵy birneshe eldi mekenderdegi ınternet baılanysynyń sapasy da ózektiligin joǵaltqan joq», - dedi ol.
Aýdan halqy Buqtyrma sý qoımasy arqyly ótetin kópir máselesin de nazardan tys qaldyrmaǵan.
«Osyǵan baılanysty ótken jyly baıqaý ótip, merdiger kompanııa anyqtalǵanyn atap ótkim keledi. Bıyl oblystyq bıýdjetten 1 mlrd teńge bóldik, jaqyn arada merdigerler jumysqa kirisedi», - dedi Danıal Ahmetov.
Onyń aıtýynsha, Kúrshim aýdany - oblystyń áleýmettik mańyzy zor aýdandarynyń biri.
Shalǵaıdaǵy eldi mekenderdiń áleýmettik-ekonomıkalyq áleýetin arttyrýǵa erekshe nazar aýdarylyp, 6,8 mlrd teńge ınvestıtsııa tartylǵan.
Óńirdiń shekara mańyndaǵy aýmaqtardy damytýdyń keshendi jospary aıasynda Qaljyr jáne Boran aýyldarynda sý qubyry jelileriniń qurylysy aıaqtaldy.
«Alty aýylda sý tazartý úshin blokty-modýldi stantsııalar ornatyldy. Marqakól aýylynda sý qubyry jelilerine aǵymdaǵy jóndeý júrgizildi. 39 shaqyrym aýylaralyq avtokólik joldary jóndelgen. Kúrshim aýylyndaǵy jabyq basseınniń qurylysy aıaqtalyp, Qaljyr aýylynda sport modýliniń qurylysy bastaldy», - dedi oblys ákimi.