Buqtyrmada týrızmdi damytý úshin jaǵajaı abattandylylyp, jańa saıabaq salynbaq
Buǵan deıin óńirdiń injý-marjany sanalyp kelken Alakól qazir Shyǵys Qazaqstannan bólinip shyqqan Abaı oblysynyń quramynda. Endi aımaq týrızmin Buqtyrma jaǵalaýynda damytý kózdelip otyr.
Osy maqsatta qandaı jumystar atqarylatynyn aqparat ortalyǵynda ótken baspasóz máslıhatynda oblystyq kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Marat Qabaqov aıtyp berdi.
«Buqtyrmadaǵy týrızmdi damytý jumystary 3 kezeńde júrgiziledi. Birinshi kezeń bıyl bastalady. Onda Altaı aýdany Jańa Buqtyrma kentiniń ortalyq bóligin abattandyrýmen aınalysamyz. Búgingi tańda joldardy kúrdeli jóndeý jáne kóshelerdi abattandyrý boıynsha jobalar ázirlendi. Sondaı-aq, saıabaq pen serýendeý aımaqtaryn jaryqtandyrý, kógaldandyrý jumystary júrgiziledi», - deıdi ol.
Kelesi jyldyń sońyna deıin jalǵasatyn jobanyń ekinshi kezeńinde «Arbat» jaıaý serýendeý aımaǵy salynyp, qoǵamdyq jaǵajaı abattandyrylmaq.
«Jumystar jer ýchaskeleri rásimdelgennen keıin bastalady. Jerdi alý merzimi – osy jyldyń mamyr aıynyń basy. Sodan soń Oktıabrskıı kentindegi qoldanystaǵy órt sóndirý deposynyń aýmaǵynda 2 avtokólikke arnalǵan órt sóndirý beketi men garaj boksyn salý kózdelip otyr», - deıdi M. Qabaqov.
Onyń aıtýynsha, úshinshi kezeńde Jańa Buqtyrma kentinde jańa saıabaq salynady. Onda oıyn alańdary, velo-serýendeý aımaǵy, qoǵamdyq tamaqtanatyn oryndar, kontserttik sahna jáne sáýlettik nysandar bolady.