Býkmekerlik keńselerdi oıyn aımaqtaryna kóshirý máselesi kóterildi

ASTANA. QazAqparat - Býkmekerlik keńselerde qumarlyqty arttyrýdyń ádisteri paıdalanylýda. Bul týraly búgin zań jobalaý qyzmeti máseleleri jónindegi vedomstvoaralyq komıssııanyń kezekti otyrysy barysynda QR Mádenıet jáne sport mınıstrliginiń jaýapty hatshysy Qýatjan Ýálıev málim etti, dep habarlaıdy QazAqparat.

Býkmerlik keńseler men totalızatorlardyń áleýmettik qaýpin tómendetý máselesine toqtalǵan ol, bul saladaǵy problemalar osyǵan deıin turǵyndar men buqaralyq aqparat quraldarynda birneshe márte kóterilgenin eske salyp ótti.

«Býkmekerlik kontoralar men totalızatorlar tolyqqandy oıyn mekemesi ispettes, sondaı-aq olar kóbine burynǵy kazıno ǵımarattarynda ornalasqan jáne qumar oıyndary nysandaryna tán belgiler baıqalady»,-dedi jaýapty hatshy «Qazaqstan Respýblıkasynyń keıbir zańnamalyq aktilerine oıyn bıznesi máseleleri boıynsha ózgerister men tolyqtyrýlar engizý týraly» zań jobasynyń tujyrymdamasyn qarastyrý barysynda.

Osy oraıda ol atalǵan keńselerdiń keńinen taralýy men qumarlyqty arttyrýdyń ádisterin paıdalaný, óz kezeginde táýeldiliktiń paıda bolýymen qatar, osy mekemelerge jańa adamdardyń kóptep tartylýyna yqpal etetinin atap ótti.

«Bul rette býkmekerlik kontoralar men totalızatorlardy oıyn aımaqtaryna aýystyrý, sondaı-aq «totalızator kassasy» nemese «býkmekerlik kontora» túsinigin aıqyndaýdyń bastapqy redaktsııasyna oralý usynylady»,-dep atap ótti Ýálıev.

Onyń paıymynsha, tez baıýǵa azǵyrý ádisterin boldyrmaý joǵaryda atalǵan problemalardy sheshýge yqpal etedi jáne atalǵan nysandarǵa táýeldi adamdardyń sanyn azaıtýǵa múmkindik beredi.