«Býkmekerlik keńseler basqa ǵımaratqa kóshedi» - baspasózge sholý
« Egemen Qazaqstan » gazetiniń búgingi sanynda QR Prezıdentiniń Batys Qazaqstan oblysyna jasaǵan sapary jaıynda « Oral óńirinde órkendi ister kóp » keń kólemdi maqala jarııalandy.
Munda Memleket basshysy «Jastar qýatty Qazaqstan úshin» atty respýblıkalyq forýmǵa qatysyp, sóz sóıledi. Oǵan jınalǵan eki myńnan astam órender arasynda qazaqstandyq talantty jastardyń úlken shoǵyry - ǵalymdar men sportshylar, kásipkerler, shyǵarmashyl jáne jumysshy jastar ókilderi bar bolatyn. Elbasy olardy forým jumysynyń bastalýymen quttyqtap, eldegi jarqyn bastamalardyń belsendi qatysýshylary ekenin atap kórsetti.
Forýmda sóılegen sózinde Nursultan Ábishuly sportshy jastardyń jetistigine kóńili tolatynyn aıtty. Atap aıtqanda, Memleket basshysy Ilıa Ilın, Gennadıı Golovkın, Denıs Ten, Aleksandr Vınokýrov sekildi Olımpıada jeńimpazdary esimderi búkil álemge tanymal ekenin atap ótti. Olar qazaqstandyq jastardyń búgingi býyny úshin úlgi bolmaq. Qazirgi kúni elimizde 1500 sport nysany, stadıondar, hokkeı jáne tennıs korttary jumys isteıdi. Oǵan memleket tarapynan úlken qoldaý jasalýda. Aıtalyq, Oraldaǵy tennıs korty Qazaqstan tennıs federatsııasynyń kómegimen salynǵan. Munda bolashaq chempıondar ósip shyǵatynyna senimim mol. Qazaqstan jastary úshin búkil álemge jol ashyq. Munyń bári beıbitshilik pen turaqtylyqtyń, Qazaqstan halqynyń aýyzbirligi men túsinistiginiń arqasy, dedi Prezıdent.
Keshe tústen keıin Elbasy Nursultan Nazarbaev jumys saparymen Aqtóbege keldi, dep jazady «Egemen Qazaqstan» kelesi maqalasynda.
«Memleket basshysy birden oblystyq kóp salaly aýrýhanaǵa atbasyn tiredi. Aq halattylar sáýirdiń shýaǵyndaı aqjarqyn qýanyshty júzben qarsy aldy. Munda Elbasy aýrýhana ujymymen kezdesti. Bul emdeý mekemesi Prezıdent N.Nazarbaevtyń bastamasymen «100 mektep, 100 aýrýhana» memlekettik baǵdarlamasy aıasynda salynǵan-dy. 320 kereýettik oblystyq kópsalaly aýrýhana qurylysyna 11,8 mıllıard teńge jumsaldy», - delinedi maqalada.
Sodan keıin Nursultan Ábishuly kezdesýge jınalǵan aq halattylarmen áńgimelesti. Qazaqstan Prezıdenti bul aýrýhananyń jańa ǵımaratta ornalasqanyn, zamanaýı quraldarmen jabdyqtalǵanyn atap ótti.
«Kóp nárse endi sizderge baılanysty. Eger óz jumystaryńyzdy sapaly atqaryp, qolda bar jabdyqtardyń múmkindigin tolyq paıdalanatyn bolsańyzdar, halyq densaýlyǵyn jaqsartýǵa zor úles qosasyzdar. Bizdiń elimizde densaýlyq saqtaý salasyna zor kóńil bólinip otyr, Qazaqstan jan basyna shaqqanda bul salaǵa bólinetin qarajat kólemi jóninen damyǵan elder deńgeıine taıap keledi. Respýblıkada sońǵy 20 jylda myńǵa jýyq densaýlyq saqtaý nysany salyndy. Halyq otandyq medıtsınaǵa senim arta bastady, al kórshi elderdiń azamattary emdelý úshin bizge keletin boldy», - dedi Memleket basshysy.
Al respýblıkalyq «Aıqyn» basylymynda «Býkmekerlik keńseler basqa ǵımaratqa kóshedi» atty maqala jarııalandy.
Gazettiń jazýynsha, jaqynda Qazaqstanda býkmekerlik keńselerdiń «uly kóshi» bastalmaq: olarǵa turǵyn úılerden jappaı ketip, basqa ǵımarattar izdeýge týra keledi.
«Qasym-Jomart Toqaevtyń tóraǵalyǵymen ótken keshegi jalpy otyrystarynda senatorlar «Keıbir zańnamalyq aktilerge oıyn bıznesi máseleleri boıynsha ózgerister men tolyqtyrýlar engizý týraly» zańynyń jobasyn birinshi oqylymda maquldady. Bul jobaǵa sáıkes, adamdar turatyn kópqabatty úılerde býkmekerlik keńselerdiń jumys jasaýyna budan bylaı tyıym salynady», - delingen maqalada.
Respýblıka boıynsha qyzylshaǵa qarsy júrgizilgen ekpeden keıin Jańaózendegi jaǵdaı ońalmaı tur, dep habarlaıdy «Aıqyn» basylymy «Ekpe esten tandyryp tur» atty maqalada.
«Ondaǵy ata-analar ekpe alǵan balalarynyń jaǵdaıyn aıtyp, muńyn shaǵýda. Mańǵystaý oblystyq densaýlyq saqtaý basqarmasynyń jibergen málimeti boıynsha, ekpe egilgen 2333 jasóspirimniń 200-ge jýyǵynyń hali nasharlaı túsken. Sonyń 50-den astamynyń áli kúnge deıin basy aýyryp, aıaq-qoldary tartylyp, esinen tanyp jatqandary bar. Al medıtsına salasynyń mamandary muny qalypty jaǵdaıǵa balap otyr, sondaı-aq buǵan vaktsınanyń qatysy joqtyǵyn málimdeıdi. Eń ókinishtisi, balasynyń janyn aman saqtap qalý úshin shyryldaǵan ata-analar oǵan nendeı emdeý sharalaryn, qandaı amal jasaryn bilmeı, qoldary jipsiz baılanyp otyr. Tipti keıbireýi emshi jaǵalap ketken. Elimizde jasalyp jatqan emnen kúder úzgen olar jergilikti organnan balalaryn shetelde emdeýge aqshalaı kómek kórsetýlerin suraıdy. Bul máselege mınıstrlik muqııat nazar aýdarýǵa tıis dep esepteımiz», - delingen materıalda.
Resmı tilde jaryq kóretin «Ekspress K» basylymynyń erekshe otbasy týraly «2+8=MAMA» atty maqalasy oqyrman nazaryn tartpaı qoımaıtyny anyq.
Elorda turǵyny Janar Baıjýldınova áıel baqytynyń óz retseptin oılap tapty, dep jazady gazet.
2012 jyly ol shymkenttik perzenthanadan tórt aılyq Darııany alady, keıin bir jyldan soń januıaǵa 13 jasar Tatıana esimdi qyz qosyldy. Al jarty jyldan keıin onyń shańyraǵynda taǵy alty bala paıda boldy.
«Men osylaısha 39 jastaǵy jalǵyzbasty kópbalaly ana atandym», - deıdi Janar. - Mende ózimniń týǵan 2 balam bar. Taǵy 8 asyrandy balalaryma jaqsy ana atanatynyma úmittenemin».
Ol on balamen ómirlik jar tabý qıynǵa soǵady dep esepteıdi. Degenmen qıyn-qystaý sátte tirek bolatyn otaǵasy bolsa dep armandaıdy.