Býkmekerlik keńse Bas prokýratýranyń yqpalymen 1,8 mlrd teńge aıyppul tóledi

ASTANA. QazAqparat - Jyl basynan beri Joǵarǵy sot Bas prokýrordyń narazylyǵy negizinde 11 sot aktisin qaıta qarap, memleket paıdasyna 2,6 mlrd. teńge óndirdi. Bul týraly QazAqparat Bas prokýratýranyń baspasóz qyzmetine silteme jasap habarlaıdy.

Bul memlekettik satyp alý, salyq jáne t.b. daýlarǵa qatysty.

Mysaly, Almaty qalasynyń sottary zańsyz salyq organynyń habarlamasynyń kúshin joıyp, «OLIMPKZ» býkmekerlik keńsesi» JShS-in 1,8 mlrd. teńgege oıyn bıznesine salyq tóleýden bosatqan.

Býkmekerlik keńse oıynshylardan ınternet utystar qabyldaıdy. Oıynshy utylsa, ol Olımptiń kirisi jáne túsken qarajattan oıyn bıznesine salyq tólenýi tıis. Alaıda, Olımp salyqty tólemegen. Nátıjesinde memleketke 1,8 mlrd. teńge mólsherinde zalal keltirdi.

Bul oraıda Qazaqstan Respýblıkasynyń Bas Prokýrory narazylyq engizdi.

Joǵarǵy Sot narazylyqtyń ýájderimen kelisip, 2018 jyldyń 27 naýryzynda jergilikti sottardyń sot aktileriniń kúshin joıdy jáne Olımptiń ótinishin qanaǵattandyrmady.

Sol kúni Olımp 1,8 mlrd. teńge kóleminde salyqty tóledi.

Sonymen qatar, Joǵarǵy Sot Bas Prokýrordyń basqa da ister boıynsha narazylyǵy negizinde 800 mln. teńge qosymsha salyq salýdy zańdy dep tanydy. Óıtkeni salyq tóleýshiler taýardy belgili bir tulǵalardan alǵanyn dáleldeı almady.