Búkilálemdik jaýyngerlik óner oıyndarynda Qazaqstan úzdik úshtikke kirdi
Sportty damytý dırektsııasynyń baspasóz qyzmetinen málim etkenindeı, bıylǵy oıyndar Qazaqstan úshin eń tabysty boldy.
On bir kúnniń ishinde 16 sport túrinen 1500-den astam atlet 954 medaldi ózara sarapqa saldy. Onyń 259-y altyn, 259-y kúmis bolsa, qalǵan 436-sy – qola.
Qazaqstan delegatsııasy 12 altyn, 13 kúmis pen 23 qola medal jeńip alyp, jalpy esepte 3-orynǵa kóterildi. Kósh basynda Ýkraına (21 altyn, 17 kúmis, 15 qola), odan keıin sońǵy jarys kúni ekinshi orynǵa shyqqan Saýd Arabııasy (12 altyn, 20 kúmis, 19 qola) tur.
Búkilálemdik jaýyngerlik óner oıyndaryna óz sportshylaryn jibergen 120-dan astam eldiń 87-sine júlde buıyrdy.
Qazaqstan delegatsııasy úshin Ár-Rııadtaǵy keshendi jarystyń ár kúni tarıhı nátıjemen este qalyp otyrdy. Máselen, oıyndar baǵdarlamasyna alǵash ret qosylǵan qazaq kúresi men armrestlıngten ulttyq qurama sportshylary tabysty óner kórsetip, komandalyq esepte 1-oryn aldy. Sambo men grepplıngten qorjynǵa World Combat Games-tiń alǵashqy altyny tússe, karateshiler birinshi ret júldegerler qatarynan kórindi.
Jalpy, el namysyn 10 sport túrinen 53 sportshy qorǵady.
«Bul oıyndarǵa keıbir sport túrlerinen negizgi quramdy alyp barmasaq ta, sapaǵa barynsha nazar aýdardyq. Biz úshin ulttyq sportymyz – qazaq kúresiniń oıyndar baǵdarlamasyna alǵash ret kirgeni qýantarlyq jaıt. Palýandarymyz jaqsy nátıje kórsetti. Dál osylaı armrestlıngke qatysty aıtýǵa bolady. Ulttyq qurama alǵa qoıylǵan jospardy oryndady. Jarys barysynda qandaı kemshilikter baryn da kórdik. Endi solardy taldap, bapkerlermen birge osy baǵytta jumystanamyz», – dedi QR TSM Sport jáne dene shynyqtyrý isteri komıtetiniń bas mamany Kelbet Nurǵazına.
Osy kórsetkishtiń arqasynda Qazaqstan jaýyngerlik óner oıyndarynyń jalpy reıtıngisinde 37-den úzdik ondyqqa kirdi. Buǵan deıin Beıjiń men Sankt-Peterbýrgti qosqanda, qorjynǵa 1 altyn, 3 kúmis jáne 5 qola túsken.
«Oıyndar kezinde 16 sport túriniń ishindegi aıkıdo, armrestlıng, djıý-djıtsý, mýaıtaı, sambo men savateden (frantsýz boksy) para-atletter arasynda arnaıy jarys ótti. Jekpe-jek óneriniń jankúıerlerine básekelerdi resmı saıttan tikeleı efırde kórsettik. Habar taratýshylardyń arqasynda 100-den astam memlekettiń aýmaǵyna sıgnal tarattyq», – dedi «Sport Akkord», ıaǵnı oıyndar prezıdenti Ivo Ferrıanı.
Kelesi oıyndar 2025 jyly ótpek. Qabyldaıtyn memleket aldaǵy jyldyń basynda belgili bolady.