Búkilálemdik bank Qazaqstannyń búkil óńirlerine sýbulttyq reıtıng júrgizedi

NUR-SULTAN. QazAqparat - Búkilálemdik bank pen Ulttyq ekonomıka mınıstrligi «Doing business»-tiń sýbulttyq reıtıngi zertteýiniń nátıjesi boıynsha esep beredi, dep habarlaıdy QazAqparat tilshisi.

Ultyq ekonomıka vıtse-mınıstri Arman Jumabekov atap ótkendeı, bıznes júrgizý boıynsha bizdiń elimiz halyqaralyq reıtıngte aıtarlyqtaı joǵary kórsetkishti kórsetken.

«Úkimet júıeli túrde reformalardy júrgizip keledi. Ol reformalar jemisin berip jatyr. 2014 jyldan bastap Kásipkerlik kodekske jeti birdeı zańnamalyq ózgeris engizildi. Osynyń arqasynda Qazaqstan qazirgi tańda bıznestiń jaılylyǵy boıynsha otyzdyqqa enip, 190 eldiń ishinde 28-shi orynnan kórinip otyr. 28-shi oryn, álbette, joǵary kórsetkish. Alaıda biz bunymen shektelip qalmaımyz», - dedi Arman Jumabekov elordada ótip jatqan jıynda.

Vıtse-mınıstrdiń aıtýyna qaraǵanda, júrgizilip jatqan reformalardyń barlyǵy aımaqtardyń jetistikterimen ólshenedi.

«Aımaqtardaǵy jumystarynyń nátıjesinen ǵana qabyldanǵan zańnyń tıimdiligi kórinedi. Sol sebepti, Qazaqstan Úkimeti men Búkilálemdik bank memlekettiń bızneske qatysty reformalary qanshalyqty tıimdi júzege asyrylyp jatqanyna taldaý júrgizedi», - dedi ol.

Arman Jumabekov óz sózinde Qazaqstannyń 8 aımaǵynda 2017 jyly «Doing business»-tiń sýbulttyq reıtınginiń pılottyq jobasy qosylǵanyn aıtty.

«Sol reıtıngtiń qorytyndysy boıynsha atalmysh reıtıngti Qazaqstannyń búkil aýmaǵyna ótkizý týraly sheshim qabyldandy. Búkilálemdik bank sarapshylarynyń taldaýy óńirlerdiń osy protsesske qanshalyqty qatysatynyn kórsetip berýi tıis. Sýbulttyq reıtıngtiń qorytyndysy osy baǵyttaǵy úzdik tájirıbelerdi tanytary sózsiz. Eń úzdik tájirıbeler respýblıkanyń basqa aımaqtaryna taratylady», - dedi vıtse-mınıstr.

Aıta ketsek, Doing business - Búkilálemdik bankpen júrgiziletin, álemdegi ınvestıtsııalyq klımattyń jaı-kúıin anyqaıtyn ındıkator.