Búkil stýdentter jasandy ıntellekt boıynsha kýrs oqýǵa mindetteledi

ASTANA. QazAqparat – Qazaqstannyń joǵarǵy oqý oryndarynyń oqytý baǵdarlamasyna jasandy ıntellekt boıynsha mindetti kýrs engiziledi. Bul týraly QR Ǵylym jáne joǵary bilim mınıstri Saıasat Nurbek elordada joǵary bilim jáne ǵylym forýmynda aıtty, dep habarlaıdy QazAqparat tilshisi.

«Keleshekte jasandyq ıntelektini meńgergen mamandar suranysqa ıe bolady, al ıgermegender – jumys oryndarynan aıyrylady. Sondyqtan, esterińizde bolsa birinshi strategııany tsıfrlyq saýattylyq uǵymynan bastaǵan edik. Barlyq jerde tsıfrlyq saýattylyq bolýy keregin aıttyq. Ózderińiz kórgendeı, bir jylda álemde úlken ózgerister boldy, biz endi tsıfrlyq emes, jasandy ıntellekt salasynda saýatty bolý keregin aıtyp jatyrmyz. Biz qazir Google kompanııasymen birlesip, jasandy ıntellekt saýattylyǵy jónindegi kýrsty pysyqtap jatyrmyz», - dedi Saıasat Nurbek.

Mınıstrdiń aıtýynsha, kelesi aıdyń sońynda Nıý-Iorkte kelisimshart jasalýy múmkin jáne kelesi oqý jylynan bastap barlyq stýdentter mindetti túrde jasandy ıntellekt jónindegi kýrsty oqıdy.

«Bizdiń ustanymymyz - ony mindetti etý, óıtkeni barlyq stýdent oqýyn aıaqtaǵanda jasandy ıntellekt salasynda negizgi quzyretke ıe bolady. Bul ınnovatsııalyq kýrs bolady, óıtkeni álemde joq», - deıdi Ǵylym mınıstri.

Aıta keteıik, Astanada tuńǵysh ret joǵary bilim jáne ǵylym forýmy ótip jatyr.

Forýmnyń taqyryby eldiń ekonomıkalyq ósýiniń negizi retinde adamı kapıtaldy damytýǵa arnalǵan.