Búkil qazaqstandyqtardy elimizdiń bolashaǵyn birge qurýǵa shaqyramyn – Máýlen Áshimbaev

NUR-SULTAN. QazAqparat – QR Parlamenti Senatynyń tóraǵasy Máýlen Áshimbaev «Habar» agenttigi ótkizip jatqan telekópirge qatysyp, búkil qazaqstandyqtardy elimizdiń bolashaǵyn birge qurýǵa shaqyrdy, dep habarlaıdy QazAqparat tilshisi.

«Konstıtýtsııaǵa usynylyp otyrǵan ózgertýlerdi 4 blokqa bólýge bolady. Birinshisi – Qazaqstanda adam quqyqtaryn qorǵaý mehanızmderin jetildirýdi qamtıdy. Bul baǵytta Konstıtýtsııalyq sot qurý, Adam quqyqtaryn qorǵaý jónindegi ýákildiń mártebesi men táýelsizdigin nyǵaıtý jáne basqa da normalar jumys isteıdi.

Ekinshisi – bıliktiń ókildik organdarynyń, atap aıtsaq, Parlament pen máslıhattardyń ortalyqtaǵy jáne jer-jerdegi jumysyn tıimdi ete túsýge baǵyttalady.

Sondaı-aq, depýttardyń halyq aldyndaǵy, el azamattary aldyndaǵy jaýapkershiligin joǵarylatý kózdelip otyr», - dedi Senat spıkeri.

Onyń aıtýynsha, túzetýlerdiń úshinshi bóligi jergilikti bılik organdarynyń óz betimen jumys isteý qabiletin nyǵaıtýǵa baǵyttalady.

«Ákimder halyqtyń áleýmettik baqýatyn arttyrýǵa baǵyttalǵan sharalardy iske asyrýy kerek.

Tórtinshisi – bılikti monopolııasyzdandyrý, Qazaqstandaǵy saıası básekelestikti arttyrý. Saıası partııalar ózara básekede bolýy kerek. Prezıdent laýazymyndaǵy adam qandaı da bir partııanyń múshesi bola almaıdy. Usynylyp otyrǵan túzetýde bul másele aıqyn jazylǵan», - dedi Máýlen Áshimbaev.

Aıta keteıik, búgin Prezıdent Qasym-Jomart Toqaev 5 maýsym kúni ótetin referendýmǵa baılanysty Qazaqstan halqyna beıneúndeý joldady .