Búkil el qazir bir ıdeıanyń, bir usynystyń tóńireginde judyryqtaı jumylyp otyr - S. Abdrahmanov

ASTANA. QazAqparat - Memleketimiz úshin taǵdyrsheshti kezekten tys prezıdenttik saılaý máselesin qazir sheship, jasampazdyq jolymyzdy jalǵastyrýǵa múmkindik alýymyz kerek. Búgin «Egemen Qazaqstan» gazetiniń prezıdenti Saýytbek Abdrahmanov osyndaı pikir bildirdi.

«Dál osy kúnderi jurttyń aýzynan túspeı turǵan taqyrypqa baılanysty uzaq aıtyp jatý artyq dep oılaımyz. Búkil el, búkil halyq qazir bir ıdeıanyń, bir usynystyń tóńireginde judyryqtaı jumylyp otyr. Barlyq býyn ókilderi, barlyq top ókilderi Qazaqstan halqy Assambleıasy keńesiniń osy usynysyn kókeıge ábden qonymdy deýde», - dedi ol.

Onyń atap ótýinshe, kezekten tys prezıdenttik saılaý bastamasyn elimizdegi barlyq saıası kúshter de qoldap, elimizdiń buqaralyq aqparat quraldarynyń betinde de osy máselege qatysty oń kózqaras qalyptasqan.

«Qaı jaǵynan qaraǵanda da bul - óte oryndy. Birinshiden, bir jylda eki saılaýdy ótkizý Konstıtýtsııaǵa qaıshy ekendigin aıtýdyń ózi jetkilikti. Ekinshiden, qazirgi álemde qalyptasyp otyrǵan jaǵdaı. Biz ózimizdiń memleketimiz úshin taǵdyrsheshti máseleni osy kezde, erte jaryqta sheship, jasampazdyq jolymyzdy jalǵastyrýǵa múmkindik alýymyz kerek ekendigin kórsetedi. Sondyqtan bul usynysty biz tolyq qoldaımyz», - dedi S.Abdrahmanov.

Onyń aıtýynsha, «Egemen Qazaqstan» gazetiniń betinde kezekten tys prezıdenttik saılaýǵa qatysty materıaldar kúndelikti jarııa etilýde.